सोशल मीडियावर बदनामी केल्याप्रकरणी पाच जणांवर गुन्हा
महाड, ता. ७ (बातमीदार) : लग्न ठरलेल्या मुलीची अन्य चार जणांच्या सहकार्याने सोशल मीडियावर बदनामी केल्याप्रकरणी एका तरुणासह एकूण पाच जणांवर महाड शहर पोलिस ठाण्यात गुन्हा दाखल करण्यात आला आहे.

नवाब नवाज करबेलकर याचे महाड तालुक्यातील एका मुलीसोबत लग्न ठरले होते; परंतु नवाबचे दुसऱ्या मुलींसोबत प्रेमसंबंध असल्याचे या नवरी मुलीला समजल्यानंतर नवाबने या मुलीला हे लग्न मोडण्यासाठी सांगितले. मुलीने हे लग्न मोडल्यानंतर नवाबने सोशल मीडियावर एका दुसऱ्या व्यक्तीच्या नावाने बनावट अकाउंट उघडून आपल्या अन्य चार साथीदारांच्या मदतीने २० सप्टेंबर ते २३ नोव्हेंबर २०२४ या कालावधीत मुलीच्या चारित्र्याविषयी बदनामी सुरू केली. तसेच, फेक अकाउंटधारकासोबत मुलीचे खोटे संभाषण तयार करून त्याचे स्क्रीनशॉट काढून ते मित्रांच्या मोबाईलवर पाठवून मुलीची बदनामी केली. याबाबतची माहिती पीडितेने महाड शहर पोलिस ठाण्यात धाव घेत गुरुवारी (ता. ५) नवाबसह या अन्य चार आरोपींविरोधात तक्रार दाखल केली. त्यानुसार पोलिसांनी नवाब नवाज करबेलकर याच्यासह नवाज जमीरुद्दीन करबेलकर, आजिमा नवाज करबेलकर, नरिमा नवाज करबेलकर, नमरीन नवाज करबेलकर यांच्याविरोधात गुन्हा दाखल केला आहे. या घटनेचा अधिक तपास पोलिस निरीक्षक संतोष जाधव यांच्या मार्गदर्शनाखाली सुरू आहे.