धनगर समाजाच्या पाठीशी राष्ट्रवादी शरद पवार गट
रायगडावर पुरातत्त्वच्या नोटिशीनंतर सक्षणा सलगर यांनी घेतली भेट

महाड, ता. १६ (बातमीदार) : स्वराज्याची राजधानी किल्ले रायगडावर परंपरागत राहत असलेल्या धनगर समाजाच्या वस्तीला केंद्रीय पुरातत्त्व विभागाने अतिक्रमण हटाव मोहिमेअंतर्गत नुकत्याच गड सोडण्याच्या नोटिसा बजावल्या आहेत. याचा सर्व स्तरावरून निषेध होत असतानाच राष्ट्रवादी काँग्रेस शरद पवार गटाच्या युवती राष्ट्रीय अध्यक्ष सक्षणा सलगर यांनी रविवारी (ता. १५) किल्ले रायगडावर दाखल होत छत्रपती शिवरायांना अभिवादन करून गडावरील धनगर समाजाच्या व्यथा जाणून घेतल्या.
गडउतार होताच सलगर यांनी महाड शासकीय विश्रामगृह येथे पत्रकार परिषद घेत भूमिका स्पष्ट केली. सक्षणा सलगर यांनी सरकारवर निशाणा साधताना फक्त किल्ले रायगडावरील अतिक्रमण दिसते का, असा प्रश्‍न उपस्थित केला आहे. पक्षाचे नवनिर्वाचित जिल्हाध्यक्ष रवींद्र चव्हाण आणि त्यांच्या पत्नी कुमुदिनी यांच्यासह अन्य पदाधिकारी व कार्यकर्ते या वेळी उपस्थित होते.
धनगर समाज हा पिढ्यानपिढ्या पारंपरिक पद्धतीने गडावर वास्तव्यास असून येणाऱ्या पर्यटकांना व्यवसायाच्या माध्यमातून चहा, नाश्ता, भोजन, शीतपेय व अन्य प्रकारची सेवा उपलब्ध करून देत आहेत. त्याचबरोबर गडस्वच्छता, गडसेवादेखील करीत आहेत. आम्हाला सरकारचा बंगला नको, जागा नको, आम्हाला रायगडावरच्या मातीवरच राहायचे आहे, अशी धनगर समाजाची भूमिका असल्याचे त्यांनी स्पष्ट केले. किल्ले रायगडावरील धनगर समाजासाठी सर्व स्तरावरून पाठिंबा मिळताना दिसत असून आता पुरातत्त्व विभागाने बजावलेल्या नोटिशीबाबत केंद्र सरकार आणि राज्य सरकार काय भूमिका घेते, यावर सगळ्यांचेच लक्ष लागले आहे.

महाड ः गडावरील धनगर समाजाची सक्षणा सलगर, रवींद्र चव्हाण यांनी भेट घेतली.