विद्यार्थ्यांच्या स्‍वागताला अधिकारी वर्ग
पहिल्याच दिवशी नवीन गणवेश, दप्तर व पाठ्यपुस्तकांचे वाटप

महाड, ता. १६ (बातमीदार) : उन्हाळी सुट्टीत मौजमजा केल्यानंतर शाळेत येणाऱ्या मुलांना शाळा आपली वाटावी, मुलांना शाळेची ओढ लागावी, यासाठी सोमवारी (ता. १६) शाळेच्या पहिल्या दिवशी शाळेत दाखल झालेल्या विद्यार्थ्यांचे शाळा व शिक्षण विभागाकडून मोठ्या जल्लोषात स्वागत करण्यात आले. महाड तालुक्यातील तब्बल ३०० शाळांमध्ये शाळा प्रवेशोत्सवाचा कार्यक्रम राबवण्यात आला. शाळेच्या पहिल्या दिवशी विविध सरकारी अधिकाऱ्यांनी जिल्हा परिषदेच्या मराठी शाळांना भेट देत विद्यार्थ्यांचे स्वागत केले.
शाळेच्या पहिल्या दिवशी शाळेत जाताना अनेक मुले रडतात. मोठी सुट्टी घेतल्यानंतर अनेकांना शाळेत जाण्याचा कंटाळाही येतो. यामुळे मुलांना शाळा नकोशी वाटते. मुलांमधील ही भीती दूर करून शाळा आपलीशी वाटावी, अभ्‍यासाबाबत गोडी निर्माण व्हावी, या दृष्टीने तालुक्यातील ३०० शाळांमध्ये नव्याने दाखल झालेल्या विद्यार्थ्यांचे गुलाबपुष्प तसेच खाऊ देऊन स्वागत करण्यात आले. याशिवाय शाळेत दाखल झालेल्या मुलांना पहिल्या दिवशी नवीन गणवेश, दप्तर व पाठ्यपुस्तकेदेखील देण्यात आली. यामुळे पहिल्या दिवशी शाळेत आलेले विद्यार्थी खूष झाले. काही शाळांमध्ये तोरण-फुले, पताका तसेच फुगे लावून शाळा सजवण्यात आली होती. गावांमधून प्रभातफेरीदेखील काढण्यात आली. विद्यार्थ्यांना शालेय पोषण आहारामध्ये गोड पदार्थही देण्यात आला.
महाड तालुक्यातील जिल्हा परिषदेच्या शाळांमध्ये प्रांताधिकारी पोपट ओमाहा, तहसीलदार महेश शितोळे, गटविकास अधिकारी स्मिता पाटील, तालुका वैद्यकीय अधिकारी डॉक्टर नितीन बावडेकर, गटशिक्षणाधिकारी राजन सुर्वे, सहाय्यक गटविकास अधिकारी राजेंद्र जाधव तसेच विविध विभागाच्या सरकारी अधिकाऱ्यांनी शाळांना भेटी देऊन मुलांचे स्वागत केले. या पाहुण्यांच्या हस्ते विद्यार्थ्यांना गणवेश, पाठ्यपुस्तके, बूट, दप्तरे यांचे वाटपही करण्यात आले. शाळांमध्ये सरपंच, उपसरपंच, स्थानिक पदाधिकारी तसेच शाळा समितीचे अध्यक्ष उपस्थित होते.

महाड ः नडगावातील शाळेत गटशिक्षणाधिकारी राजेंद्र सुर्वे यांच्या हस्ते पाठ्यपुस्तके वाटप करण्यात आली.

...........
पोषण आहारात गोडधोड
बच्चे कंपनीने लुटला आनंद
पोलादपूर (बातमीदार) ः शाळेच्या पहिल्‍या दिवशी नवा वर्ग, नवे शिक्षक, नवीन पाठ्यपुस्‍तकांचे विद्यार्थ्‍यांना नेहमीच कुतूहल असते. अनेक विद्यार्थी शाळेचा पहिला दिवस कसा असेल, याची आतुरतेने वाट पाहत असतात. तर पहिल्‍यांदाच शाळेत जाणाऱ्या काही मुलांना रडू येत असल्‍याने शिक्षकांना त्‍यांना सांभाळावे लागते. पोलादपूर तालुक्यातील पहिल्‍याच दिवशी जोरदार पावसाने हजेरी लावल्‍याने पालकांसह विद्यार्थ्‍यांची तारांबळ उडाली; मात्र तरीही त्‍यांचा उत्‍साह कायम होता. या वेळी नवागतांचे स्वागत करून सर्व मुलांना मोफत पाठ्यपुस्तक वाटप, गणवेश, बूट व पायमोजे वाटप व शालेय साहित्यवाटप मान्यवरांच्या हस्ते करण्यात आले. पहिल्या दिवशी शालेय पोषण आहारात गोड पदार्थ देण्यात आला.
पहिल्याच दिवशी पाठ्यपुस्तके हातात मिळाल्‍याने विद्यार्थ्‍यांच्या चेहऱ्यावर आनंद झळकत होता. विद्यार्थ्यांना पुन्हा शाळेच्या वातावरणात सामावून घेण्यासाठी काही शाळांमध्ये विशेष उपक्रम राबवण्यात आले. कुठे गुलाब फूल देऊन, कुठे पेढे वाटून, मुलांचं औक्षण करून, वर्गात प्रवेश करण्याच्या मार्गात सुबक रांगोळी काढून विद्यार्थ्यांचे स्वागत करण्यात आले. गोळेगणी शाळा व्यवस्थापन समिती अध्यक्ष ज्ञानेश्वर मोरे, मुख्याध्यापक व केंद्रप्रमुख सचिन दरेकर, अल्पना जाधव, पूजा मोरे, शिक्षक व ग्रामस्थांनी विद्यार्थ्‍यांचे उत्‍साहात स्‍वागत केले.