महाड, ता. १७ (बातमीदार) : आपल्या व्यस्त दिनक्रमातून रक्तदानासारख्या चळवळीला हातभार लावणाऱ्या रक्तमित्रांची बैठक महाड येथील जनकल्याण रक्त केंद्रामध्ये नुकतीच झाली. या वेळी रक्तमित्रांसोबत विविध उपक्रमाबाबत चर्चा करण्यात आली, तर ७० विविध क्षेत्रातील नागरिकांनी रक्तमित्र म्हणून आपली नोंदणी केली.
नियमित रक्तदान करणे हे एक महत्त्वाचे सामाजिक आणि राष्ट्रीय कार्य आहे. या सेवाभावी रक्तदात्यांच्या वाढदिवसाला रक्तमित्र म्हणून शुभेच्छा देण्यासाठी तसेच अन्य सामाजिक आरोग्य कार्यात योगदान देण्यासाठी, समाजात रक्तदान चळवळविषयी जनजागृती व्हावी आणि त्यातून नवीन रक्तदाते निर्माण व्हावेत, या हेतूने रक्तमित्र संकल्पना जनकल्याण रक्त केंद्राने समाजापुढे ठेवली. संकल्पनेला सकारात्मक प्रतिसाद देत सुमारे ७० विविध क्षेत्रातील नागरिकांनी रक्तमित्र म्हणून आपली नोंदणी केली. या सर्व रक्तमित्रांना एकत्रित करून या उपक्रमाअंतर्गत करावयाच्या विविध गोष्टींची माहिती द्यावी म्हणून रक्तदाता प्रबोधन बैठक आयोजित करण्यात आली होती. बैठकीची सुरुवात भारतमाता पूजन तसेच रक्तदान गीताने करण्यात आली. अस्मी संगीत अकादमी, महाडच्या कलाकारानी हे गीत सादर केले. या बैठकीमध्ये रक्तकेंद्राचे अध्यक्ष धनंजय परांजपे, कार्यवाह शिवराज भागवत, संचालक माधव डाकवे, संतोष जैन, अविनाश घोलप आदी उपस्थित होते.

विकास सौंदलगेकर यांनी बैठकीमध्ये प्रास्ताविक करून रक्‍तमित्र संकल्पनेची माहिती उपस्थितांना दिली. धनंजय परांजपे यांनी रक्तकेंद्राची वाटचाल तसेच रक्तमित्राची भूमिका याबाबत मार्गदर्शन केले. रक्तदात्याशी संवाद याबाबत अविनाश घोलप यांनी माहिती दिली.
बैठकीस रक्तमित्र म्हणून माणगाव येथून पॉस्को कंपनीचे प्रशासकीय व्यवस्थापक स्वप्नील पाटील, महाडमधील निवृत्त मुख्याध्यापिका अल्पना मेहता, पोलादपूर येथील शैलेश पालकर आदी उपस्थित होते.

महाड ः बैठकीला रक्त केंद्राचे पदाधिकारी उपस्‍थित होते.