आंब्याचे झाड कोसळून ३२ बगळ्यांचा मृत्यू
चवदार तळ्याशेजारील घटना

महाड, ता. १७ (बातमीदार) : ऐतिहासिक चवदार तळ्याच्या काठावर असलेल्या आंब्याच्या झाडाची फांदी पावसामुळे कोसळल्याने झाडावर वास्तव्यास असलेल्या ३२ बगळ्यांचा मृत्यू झाला असून, १८ बगळे जखमी झाले आहेत.
महाडमध्ये गेल्या काही दिवसांपासून मुसळधार पाऊस पडत आहे. या पावसामुळे चवदार तळ्याच्या काठावर असलेल्या आंब्याच्या झाडाची मोठी फांदी शनिवारी (ता. १६) सायंकाळी कोसळली. त्यावर बगळ्यांनी घरटी होती. या घरट्यांत बगळ्यांची पिल्ले तसेच फांद्यांवर शेकडो बगळे तसेच पानकावळे वास्तव्यास होते. फांदी कोसळल्याने या फांदीवर असलेल्या ३२ बगळ्यांचा जागीच मृत्यू झाला, तर १८ बगळे गंभीररीत्या जखमी झाले. यातील अनेक बगळ्यांचे पाय मोडले आहेत. या बगळ्यांवर काल रात्री महाड येथे पक्षिमित्रांकडून उपचार करण्यात आले. हा काळ बगळ्यांसाठी महत्त्वाचा असल्याने बगळ्यांचे वास्तव्य असलेली झाडे तोडू नयेत, असे आवाहन पक्षितज्ज्ञ व मानद वनरक्षक प्रेमसागर मेस्त्री यांनी केले आहे.
...
पक्षिमित्रांची धाव
घटना कळतात नगरपालिकेचे अग्निशमन दल तसेच महाड येथील पक्षितज्ज्ञ प्रेमसागर मेस्त्री आणि गणेश खातू, अंजय धनावडे, ओम शिंदे, तुषार चव्हाण, सौरभ शेठ, समीर विचारे, संकेत सकपाळ, पराग वडके, पंकज उमासर अशा पक्षिमित्रांनी व सामाजिक कार्यकर्त्यांनी या ठिकाणी तत्काळ धाव घेत बचावाचे प्रयत्न सुरू केले. पुणे येथून रविवारी (ता. १७) सकाळी आलेल्या रेस्क्यू केंद्राच्या गाडीमधून हे १८ पक्षी पुढील उपचारासाठी वन विभागाच्या सहकार्याने पुणे येथे पाठवण्यात आले. नगरपालिकेच्या अग्निशमन दलाच्या सहकार्याने ओम शिंदे याने झाडांवर चढत पक्षांसाठी घरट्यांची तात्पुरती सोय केली आहे. सिस्केप व सह्याद्री संस्था तसेच इतर प्राणिमित्र पुढील काळात या बगळ्यांच्या संगोपनासाठी प्रयत्नशील राहणार आहेत.