महाड नगरपरिषदेला १ कोटी ७० लाखांचा विकास निधी मंजूर
शहरातील पायाभूत सुविधांना मिळणार गती
महाड, ता. ३ (बातमीदार) : महाड नगरपरिषदेसाठी तब्बल एक कोटी ७० लाखांचा विकास निधी मंजूर करण्यात आला आहे. जिल्हा नियोजन समितीअंतर्गत महाराष्ट्र सुवर्णजयंती नगरोत्थान महाअभियान योजनेतून हा निधी मंजूर करण्यात आला आहे. या निधीमुळे शहरातील विविध प्रभागांमध्ये पायाभूत सुविधांच्या कामांना गती मिळणार आहे.
शहराच्या कानाकोपऱ्यात विकास पोहोचवण्याच्या दृष्टीने या निधीचे प्रभागनिहाय वाटप करण्यात आले असून, लवकरच या कामांना सुरुवात होणार आहे. या निधीतील मोठा भाग हा शहरातील सांडपाण्याची व्यवस्था (गटारे) आणि अंतर्गत रस्त्यांसाठी वापरण्यात येणार आहे. विशेषतः प्रभाग ९ आणि २ मध्ये विकसित होणाऱ्या उद्यानांमुळे नागरिकांना विरंगुळ्याचे साधन उपलब्ध होणार आहे. तसेच शाळा क्रमांक ५ च्या मैदानासाठी मिळालेल्या निधीमुळे विद्यार्थ्यांच्या क्रीडा कौशल्यांना प्रोत्साहन मिळणार आहे. मंत्री भरत गोगावले यांच्या प्रयत्नांतून हा निधी उपलब्ध झाला असून नागरिकांनी यावर समाधान व्यक्त केले आहे.