डम्परच्या धडकेत दुचाकीस्वाराचा मृत्यू

महाड, ता. १० (बातमीदार) : मुंबई-गोवा राष्ट्रीय महामार्गालगत महाड शहरात शनिवारी दुपारी झालेल्या अपघातात दुचाकीस्वाराचा जागीच मृत्यू झाला आहे. याप्रकरणी डम्परचालकाविरोधात महाड शहर पोलिस ठाण्यात गुन्हा दाखल करण्यात आला आहे. शिरीष देऊ शिंदे (वय ५५, रा. किंजळोली बुद्रुक, ता. महाड) असे मृत व्यक्तीचे नाव आहे. पोलिसांनी दिलेल्या माहितीनुसार, शनिवारी दुपारच्या सुमारास शिंदे हे त्यांच्या दुचाकीवरून महाडकडे जात असताना दोसी पेट्रोल पंपासमोरील सर्व्हिस रोडवर मागून येणाऱ्या डम्परने त्यांच्या दुचाकीला जोरदार धडक दिली. धडकेनंतर शिंदे हे रस्त्यावर कोसळले. त्याच वेळी डम्परचे पुढील चाक त्यांच्या शरीरावरून गेल्याने ते गंभीर जखमी झाले. स्थानिक नागरिकांनी तत्काळ घटनास्थळी धाव घेत मदतकार्य सुरू केले आणि शिंदेंना महाड ग्रामीण रुग्णालयात उपचारासाठी दाखल केले; मात्र गंभीर दुखापतीमुळे शिंदे यांचा जागीच मृत्यू झाला. याप्रकरणी महाड शहर पोलिस ठाण्यात डम्परचालक एम. डी. जहांगीर गुलाम मुस्तफा याच्याविरोधात गुन्हा नोंदविण्यात आला आहे.