मुंबई : भाजप नेते किरीट सोमय्या यांच्या पत्नी मेधा यांनी दाखल केलेल्या मानहानीच्या खटल्यात खासदार संजय राऊत यांच्याविरोधात शिवडी महानगर दंडाधिकारी न्यायालयाने आज अजामीनपात्र वॉरंट बजावले होते; परंतु राऊत यांनी दुपारी न्यायालयात हजेरी लावल्याने न्यायालयाने वॉरंट रद्दबातल केले.

दरम्यान, दाव्याच्या सुनावणीसाठी राऊत वारंवार गैरहजर राहिले आहेत, असा ठपका ठेवून न्यायालयाने त्यांच्यावर अजामीनपात्र वॉरंट जारी केले आहे. शुक्रवारी न्यायालयाने मेधा यांचा जबाब नोंदवला आणि पुढील सुनावणी २४ जानेवारीला निश्चित केली;

मात्र काही वेळातच राऊत यांनी न्यायालयात हजेरी लावली. त्यामुळे दंडाधिकारी पी. आय. मोकाशी यांनी वॉरंट रद्दबातल केले. न्यायालयात दाखल केलेल्या कागदपत्रांच्या छाननीनंतर सोमय्या यांच्या आरोपात तथ्य दिसते, असे मत यापूर्वी न्यायालयाने व्यक्त केले आहे.

राऊत यांनी सोमय्या यांच्यावर पत्रकार परिषदेत आरोप केले होते. तसेच समाजमाध्यमावरदेखील याबाबत माहिती दिली होती; मात्र या घोटाळ्याशी आमचा संबंध नाही, असा खुलासा मेधा सोमय्या यांनी केला आहे.

ईडीच्या हरकतीवर सोमवारी सुनावणी
पत्राचाळ गैरव्यवहार प्रकरणात खासदार संजय राऊत यांना मिळालेल्या जामिनाला ईडीने उच्च न्यायालयात आव्हान दिले आहे. तसेच विशेष न्यायालयाने आपल्या निकालपत्रात तपासावर कडक ताशेरे ओढले आहेत. यावरदेखील ईडीने हरकत घेतली आहे.

राऊत सुमारे तीन महिने या प्रकरणात कारागृहात होते. सोमवारी (ता. ९) ईडीच्या याचिकेवर सुनावणी होण्याची शक्यता आहे.