सकाळ वृत्तसेवा
मुंबई, ता. १४ : महाराष्ट्र शासनाच्या ‘साहित्यरत्न अण्णा भाऊ साठे चरित्र साधने प्रकाशन समिती’च्या वतीने अण्णा भाऊ साठे यांच्या दोन कादंबरी खंडांचे ऑडिओ व ई-बुक प्रसारण लवकरच होणार आहे. त्याची सर्व तयारी पूर्ण झाल्याने अण्णा भाऊ साठे यांचे सर्व साहित्य डिजिटल स्वरूपात वाचकांना उपलब्ध होणार असल्याची माहिती समितीचे सदस्य सचिव डॉ. संजय शिंदे यांनी ‘सकाळ’शी बोलताना दिली.
साहित्यरत्न अण्णा भाऊ साठे चरित्र साधने प्रकाशन समितीची मागील आठ महिन्यांत एकही बैठक झाली नसल्याने ‘अण्णाभाऊ साठे यांच्या साहित्याची उपेक्षा’ या मथळ्याखाली ६ जानेवारीला ‘सकाळ’ने वृत्त प्रकाशित केले होते. त्यानंतर उच्च शिक्षण विभागाने त्याची गंभीर दखल घेत समितीच्या कामकाजाचा आढावा घेत त्यासाठी कार्यवाही सुरू करण्यात आली होती. त्याच पार्श्वभूमीवर अण्णा भाऊ साठे यांच्या दोन कादंबरी खंडांचे ऑडिओ व ई-बुक प्रसारण लवकरच होणार आहे.
येत्या काळात अण्णा भाऊ साठे यांच्या २० कांदबऱ्या व कथा तमाम मराठी रसिकांना ऑडिओ स्वरूपात ऐकता येणार आहेत व ई-बुक स्वरूपात मोबाईलमध्ये वाचताही येणार आहेत. याकामी ‘पुस्तक मार्केट डॉट कॉम’ प्रकाशनने विशेष पुढाकार घेतला आहे. ही सर्व प्रक्रिया अंतिम टप्प्यात असल्याची माहिती समितीचे सदस्य डॉ. शरद गायकवाड यांनी दिली.
‘पुस्तक मार्केट’वर ऐका कादंबऱ्या
पुस्तकांच्या ऑडिओ रेकॉर्डिंगचे काम मागील वर्षभर सुरू होते. नगर आकाशवाणीच्या महेश्वरी अविनाश आणि अतुल सातपुते यांनी कादंबऱ्यांचे अभिवाचन आणि ध्वनिमुद्रण केले आहे. या नव्या वर्षात तमाम वाचकांना अण्णा भाऊ साठे यांच्या कादंबऱ्या ऐकण्याची संधी ‘पुस्तक मार्केट’ अॅपवर मिळणार आहे, अशी माहिती प्रकाशन समितीचे सदस्य डॉ. मिलिंद कसबे यांनी दिली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.