मुंबई, ता. १७ : आयसीआयसीआय बँकेने क्यूआर कोड स्कॅन करून होणाऱ्या दहा हजार रुपयांपेक्षा जास्त यूपीआय पेमेंटसाठी ईएमआय सुविधा सुरू केली असून अशी सुविधा देणारी ही पहिली बँक ठरली आहे.
‘बाय नाऊ पे लेटर’ या सेवेसाठी ग्राहकांना पेमेंटसाठी क्यूआर कोड स्कॅन करावा लागेल. तीन, सहा किंवा नऊ महिन्यांच्या हप्त्यांमध्ये ही रक्कम देता येईल. इलेक्ट्रॉनिक वस्तू, वाणसामान, वस्त्रप्रावरणे, प्रवास आणि हॉटेल बुकिंग आदी सर्व बाबींसाठी क्यूआर कोड वापरून पेमेंट केल्यानंतर ही सुविधा घेता येईल. दहा हजार रुपयांपेक्षा जास्त पेमेंट असल्यास तीन ते नऊ महिन्यांत रक्कम फेडता येईल. त्यानंतर ऑनलाईन शॉपिंगसाठीदेखील काही दिवसांमध्ये ही सोय उपलब्ध करण्यात येईल, अशी माहिती बँकेचे डिजिटल चॅनेल हेड बिजिथ भास्कर यांनी दिली. यासाठी दुकानात जाऊन खरेदी केल्यानंतर आयसीआयसीआय बँकेच्या ‘आय मोबाईल पे’ ॲप वरून पेमेंट करण्यासाठी स्कॅन एनी क्यूआरवर क्लिक करा. दहा हजार रुपयांपेक्षा मोठी रक्कम असल्यास पे लेटरवर क्लिक करा, ईएमआयचा कालावधी निश्चित करा, पेमेंट कन्फर्म करा, या पद्धतीने ही सुविधा घेता येईल.