मुंबई, ता. १ : मुंबई जिल्हा विधी सेवा प्राधिकारणातर्फे मुंबई शहरामध्ये राष्ट्रीय लोक अदालतचे आयोजन नुकतेच करण्यात आले. त्यामध्ये एकूण ४०२ कोटींची ९,९७९ प्रकरणे तडजोडीने निकाली काढण्यात आली.
लोकन्यायालयाचे उद्‍घाटन हे वृक्षाला जल अर्पण करून करण्यात आले. या वेळी पक्षकार, विधी महाविद्यालयाचे विद्यार्थी आणि अध्यक्ष अनिल सुब्रमण्यम तसेच सरकारी वकील देसाई उपस्थित होते. लोक अदालतीसाठी संपूर्ण शहरामध्ये ८६ पॅनलची स्थापना करण्यात आली होती. यामध्ये दिवाणी, फौजदारी, मोटर अपघात, बँकेचे वाद, वीजसंबंधित दावे, मोबाईल कंपनीच्या तक्रारी अशी प्रकरणे ठेवण्यात आली होती. लोक अदालतमध्ये ४५,३३१ प्रलंबित व ८०,७९१ दाखलपूर्व असे एकूण १,२६,१२२ दावे सुनावणीसाठी होते. त्यापैकी ८,३४५ प्रलंबित व १,६३४ दाखलपूर्व अशी एकूण ९,९७९ प्रकरणे तडजोडीने निकाली लागली. लोकअदालतीच्या पार्श्वाभूमीवर मुख्य महानगर दंडाधिकारी व महानगर दंडाधिकारी यांच्या न्यायालयात विशेष मोहीम राबवण्यात आली. त्यामध्ये या पाच दिवसांत १०,३१८ प्रकरणे निकाली काढण्यात आली, अशी माहिती प्राधिकरणाचे सचिव अनंत देशमुख यांनी दिली.