मुंबई, ता. २ : शैक्षणिक वर्ष २०२२-२३ च्या हिवाळी सत्रातील तृतीय वर्ष बीए सत्र ५ मानसशास्त्र विषयाचा निकाल जाहीर झाल्यानंतर अनेक विद्यार्थ्यांना अधिकाधिक गुण मिळाल्याची बाब समोर आली होती. त्याची दखल घेत विद्यापीठाने २९ एप्रिलला जाहीर झालेल्या निकालातील अनेक प्रकारच्या त्रुटी दुरुस्ती करण्यासाठी एक समिती नेमली आहे.
विज्ञान व तंत्रज्ञान विद्याशाखेचे अधिष्ठाता डॉ. शिवराम गर्जे यांच्या अध्यक्षतेखाली तीन सदस्यांच्या समितीची स्थापना करण्यात आली आहे. ही समिती मानसशास्त्र या विषयात विद्यार्थ्यांना मिळालेल्या गुणांची माहिती घेऊन त्यावर आपला अहवाल सादर करणार आहे. यामध्ये प्रामुख्याने एकाच विषयात विद्यार्थ्यांना मिळालेले जास्त गुण किंवा मिळालेले कमी गुण यांचेही मूल्यमापन केले जाणार आहे. या समितीला तात्काळ चौकशी करून अहवाल देण्याचे निर्देश देण्यात आले असून समितीचा अहवाल प्राप्त झाल्यावर यासंबंधी पुढील निर्णय घेण्यात येणार असल्याचे आज विद्यापीठाकडून सांगण्यात आले.