मुंबई, ता. ११ : नाती तुटली की त्याचा परिणाम घरातील पाळीव प्राण्यांवरही होत असतो, असे निरीक्षण मुंबई महानगर दंडाधिकारी न्यायालयाने एका प्रकरणात व्यक्त केले आहे. पाळीव प्राणी म्हणजे उत्तम जीवनशैलीचा भाग आहे. ते आपल्या आयुष्याचा भाग आहेत आणि निकोप आरोग्यासाठी आवश्यक आहेत; मात्र घरातील बिघडलेल्या नात्यामुळे त्यांनाही भावनिक हानी सहन करावी लागते, असे न्यायालयाने म्हटले आहे.

एका ५५ वर्षीय महिलेने पतीकडून प्राण्यांच्या देखभालीसाठी आणि स्वतःच्या वैद्यकीय उपचारासाठी वाढीव पोटगी मागितली होती. पतीने त्याला विरोध केला होता; मात्र महानगर दंडाधिकारी न्यायालयाने महिलेची मागणी मान्य केली असून अर्ज दाखल केल्यापासून प्रतिमहिना ५० हजार रुपये देण्याचे आदेश पतीला दिले आहेत.

पत्नीकडे तीन श्वान आहेत. पतीने तिला पोटगी देण्याचे आश्वासन दिले होते; मात्र त्याची पूर्तता केली नाही, असा आरोप तिने केला होता. पतीच्या विरोधात तिने कौटुंबिक हिंसाचार कायद्यांतर्गत तक्रार नोंदवली आहे.