मुंबई, ता. १३ : सध्याची बदलती जीवनशैली, शिक्षण-अभ्यासक्रमाची भीती, पालकांचा दबाव आणि वाढत्या स्पर्धेमुळे विद्यार्थ्यांमध्ये तणाव वाढत आहे. त्यामुळे विद्यार्थी नैराश्यात येऊन आत्महत्या करण्याच्या घटनांमध्ये लक्षणीय वाढ झाली आहे. राज्य सरकारने त्याची गंभीर दखल घेतली असून वैद्यकीय शिक्षण विभागाने राज्यातील सर्व शासकीय आणि खासगी वैद्यकीय महाविद्यालयांत शिकणाऱ्या विद्यार्थ्यांसाठी टोल फ्री मानसिक आरोग्य हेल्पलाईन सुरू केली आहे. १४४९९ क्रमांकाच्या हेल्पलाईनवर कॉल करून विद्यार्थ्यांना त्यांच्या तणावावर उपाय मिळू शकतो.
वैद्यकीय शिक्षण मंत्री गिरीश महाजन यांच्या हस्ते व्हिडीओ कॉन्फरन्सद्वारे हेल्पलाईनचे उद्‍घाटन करण्यात आले. या वेळी त्यांनी विद्यार्थ्यांसह वैद्यकीय शिक्षण विभागाच्या अधिकाऱ्यांशीही संवाद साधला.
गिरीश महाजन म्हणाले, की अभ्यासाची बदलती पद्धत आणि स्पर्धात्मक वातावरणातील वाढत्या ताण-तणावासोबतच कोणताही बदल सहजतेने हाताळला गेला पाहिजे. त्यासाठी टोल फ्री हेल्पलाईन नक्कीच फायदेशीर ठरेल, असा विश्वासही त्यांनी व्यक्त केला.

विद्यार्थ्यांचे समुपदेशन होणार
पुण्यातील महाराष्ट्र इन्स्टिट्यूट ऑफ मेंटल हेल्थमधून सुरू झालेल्या हेल्पलाईनवर तज्ज्ञ मार्गदर्शन करणार आहेत. तिथे विद्यार्थ्यांना मानसिक आरोग्याबाबत समुपदेशन व उपचार दिले जातील. हेल्पलाईनच्या अनावरणप्रसंगी विभागाच्या सचिव डॉ. अश्विनी जोशी, वैद्यकीय शिक्षण सहसंचालक अजय चंदनवाले इत्यादींसह विभागाचे संबंधित अधिकारी उपस्थित होते.