सकाळ वृत्तसेवा
मुंबई, ता. १८ : सध्या किडनीच्या आजारात वाढ झाल्याने रुग्णांना डायलिसिस मोठ्या प्रमाणावर करावे लागते. त्‍यातच खासगी डायलिसिसचा खर्च सर्वसामान्‍यांना परवडत नाही. त्यामुळे आता आऊटडोअर म्हणजेच ठराविक वेळी डायलिसिसची गरज असलेल्या रुग्णांना शासकीय तसेच महापालिकेच्या रुग्णालयात सुविधा उपलब्ध व्हावी यासाठी तातडीने कार्यवाही करणार असल्याची ग्वाही पालकमंत्री दीपक केसरकर यांनी दिली.
किडनीची कार्यक्षमता कमी असल्यावर किंवा किडनी निकामी अवस्थेत असताना डायलिसिसची गरज लागते. रुग्ण दाखल असताना डायलिसिसची अडचण येत नाही; मात्र घरी पाठवल्यावर ठराविक वेळी त्याला डायलिसिस करण्यास सांगण्यात येते. त्‍यासाठी सुमारे ७०० ते ३५०० रुपये खर्च येतो. त्यामुळे इतका खर्च सर्वसामान्‍यांना परवडत नाही. यातून अनेकदा योग्य वेळी डायलिसिस घेणे रुग्णाकडून टाळले जाते. भायखळा विधानसभेच्या आमदार यामिनी जाधव यांनी आऊटडोर रुग्णांना डायलिसिसला येणाऱ्या अडचणींचा आढावा घेऊन पालकमंत्री दीपक केसरकर यांच्याकडे समस्या मांडली. त्यामुळे त्यांनी जे. जे.सहित महापालिकेतील रुग्णालयात आऊटडोअर पेशंटसाठी डायलिसिस मशीन पुरवण्याची ग्वाही दिली.