मुंबई, ता. २६ : मुंबई मराठी ग्रंथसंग्रहालयाच्या शतकोत्तर रौप्यमहोत्सवी वर्षाच्या सांगतेनिमित्त मुंबई मराठी ग्रंथालय संचालित इतिहास संशोधन मंडळामार्फत २९ आणि ३० जुलै रोजी दोन दिवसांचे चर्चासत्र आयोजित करण्यात आले आहे. पहिल्या दिवशी ‘गेल्या पंचवीस वर्षांतील मराठी साहित्य’ आणि दुसऱ्या दिवशी ‘संयुक्त महाराष्ट्र चळवळ आणि समकालीन महाराष्ट्र’ या विषयावर चर्चासत्र होणार आहे.
ग्रंथालयांच्या दादर येथील शारदा मंगल कार्यालयाच्या तिसऱ्या मजल्यावर हे चर्चासत्र होणार असून याचे शनिवारी (ता. २९) रोजी १० वाजता ज्येष्ठ साहित्यिक मधू मंगेश कर्णिक यांच्या हस्ते उद्घाटन होईल. उद्‌घाटन सत्राचे अध्यक्ष डॉ. भालचंद्र मुणगेकर असतील; तर बीजभाषण सुरेश द्वादशीवार यांचे होईल. पहिल्या सत्रात डॉ. दत्ता घोलप‍, डॉ. किरण येले, डॉ. प्रमोद मुनघाटे, सतीश तांबे, कवयित्री नीरजा, नाटककार प्रा. हिमांशू स्मार्त, डॉ. रणधीर शिंदे, गणेश कनाटे, डॉ. दिलीप चव्हाण, डॉ. मीनल सोहोनी, प्रा. मीना गोखले आपले विचार मांडतील. रविवारी (ता. ३०) संयुक्त महाराष्ट्र चळवळ आणि समकालीन महाराष्ट्र या विषयावर हे चर्चासत्र होईल. यात डॉ. दीपक पवार, डॉ. प्राची देशपांडे, सोमिनाथ घोळवे, परिणीती दांडेकर, जास्वंदी वांबूरकर, डॉ. शरद जावडेकर, डॉ. अविनाश पाटील, डॉ. नारायण भोसले, डॉ. भालचंद्र मुगणेकर, डॉ. श्रद्धा कुंभोजकर आदी आपले विचार मांडणार आहेत.