सकाळ वृत्तसेवा
मुंबई, ता. ६ : अनधिकृत फलक छपाई करून देणाऱ्या ‘प्रिंटिंग प्रेस’ पालिकेच्या रडारवर आल्या आहेत. अशा प्रिंटिंग प्रेसना कायदेशीर नोटिसा बजावण्यात येणार आहेत. अनधिकृत फलक, बॅनर्स, बेवारस वाहने, पदपथांवरील अतिक्रमण रोखण्यासाठी पालिकेने कठोर पावले उचलण्याचा निर्णय घेतला आहे. अतिरिक्त महापालिका आयुक्त (शहर) डॉ. अश्विनी जोशी यांनी आजच्या बैठकीत हे निर्देश दिले.

मुंबई महानगरातील अतिक्रमण निर्मूलनविषयक कार्यवाहीचा आढावा डॉ. अश्विनी जोशी यांनी आज घेतला. महापालिकेने मुंबई सुशोभीकरणाची मोहीम हाती घेतली आहे. मुंबई अधिकाधिक सुंदर, स्वच्छ ठेवण्यासाठी सर्वतोपरी प्रयत्न सुरू आहेत. असे असताना, रस्ते दुभाजकांमध्ये लावलेल्या अनधिकृत फलकांमुळे शहराचे विद्रूपीकरण होत आहे. कोणतीही परवानगी न घेता फलक लावले जातात. त्यामुळे अशा अनधिकृत फलक लावणाऱ्यांसह ते छपाई करून देणाऱ्या प्रिंटर्स व्यावसायिकांनाही नोटीस बजावण्याचे निर्देश डॉ. जोशी यांनी बैठकीत दिले. सोबतच पालिका हद्दीत आढळून येणारी बेवारस व भंगार वाहने हटविण्याची कारवाई करावी. पदपथांवरील अतिक्रमण हटविण्याची मोहीम सातत्याने राबवावी. यापुढे या कारवाईला वेग देण्यात यावा, त्यासाठी प्रसंगी पोलिसांची मदत लागली तरी घ्यावी, असे निर्देशही डॉ. अश्विनी जोशी यांनी यावेळी दिले.

...
समन्वयाने मोहीम राबवावी
पालिकेच्या विविध कारवायांवेळी सर्व प्रभाग कार्यालयांतील तसेच विविध खात्यांनी एकत्रितपणे व समन्वयाने मोहीम राबवावी. तसेच करण्यात येणाऱ्या कारवाईचा दररोजचा अहवाल वरिष्ठ अधिकाऱ्यांना सादर करावा, असे निर्देशही डॉ. अश्विनी जोशी यांनी बैठकीत सर्व संबंधित अधिकाऱ्यांना दिले.