Mumbai Pollution: मुंबईतील निवळलेल्या प्रदूषणाच्या पातळीने आता पुन्हा एकदा डोके वर काढले आहे. दक्षिण मुंबईतील भायखळा परिसरातील हवेचा स्तर वाईट नोंदवल्याने तो परिसर रेड झोनमध्ये होता; तर कुलाबा, अंधेरी, वरळी, बीकेसी, चेंबूरमधील हवनेचा स्तरही घसरला आहे.

मुंबईतील सर्वाधिक वाईट हवा गुणवत्तेची नोंद भायखळा येथे ३०४ इतकी झाली आहे. यामुळे हा परिसर रेड झोनमध्ये आहे. यासह शिवडी २८१, वरळी २५५, बीकेसी २४८, माझगाव २२३, कुलाबा २१८, चेंबूर २०५, अंधेरी २०१ इतक्या हवा गुणवत्ता निर्देशांकासह वाईट हवेची नोंद झाली आहे. गेल्या महिनाभर मुंबईतील हवेची गुणवत्ता सुधारण्यात पालिका प्रशासनाला यश आले होते. धूळ नियंत्रणासाठी पाणी मारून रस्ते धुतले जात आहेत.

परिणामी, धूळ नियंत्रणात येऊन प्रदूषणाचे प्रमाण कमी झाले होते. यामुळे गेल्या चार आठवड्यांपासून मुंबई ग्रीन झोनमध्ये दिसत होती. आज मात्र अचानकपणे मुंबईतील प्रदूषण पुन्हा एकदा वाढल्याचे दिसले. असे असले तरी मालाडमध्ये हवेची स्थिती चांगली आहे. मालाडमध्ये ४१ हवा गुणवत्ता निर्देशांकासह उत्तम हवेची नोंद झाली आहे. विले पार्ले येथे हवा गुणवत्ता निर्देशांक ९० आहे; तर संपूर्ण मुंबईतील हवा गुणवत्ता निर्देशांक १५३ सह मध्यम नोंद झाली आहे.