Mumbai News: धारावीतील पुनर्विकास प्रकल्प हा धारावीकरांच्या अस्तित्वावर घाला घालणारा आहे. धारावीकरांना मूळ जागेवरून हुसकावण्याचे भाजप सरकारचे षड्‌यंत्र आहे, त्याला धारावीकरांचा तीव्र विरोध आहे. (Mumbai News)

रेल्वेच्या जागेवर ज्या इमारती उभ्या राहतील, त्यातील रहिवाशांना पूर्ण मालकी हक्क कधीही मिळू शकणार नाही, हे स्पष्ट झाले आहे. धारावी पुनर्विकासाबाबतही खूपच धक्कादायक असून पुनर्वसन इमारती रेल्वेच्या जागेवर बांधण्यात येऊ नयेत, अशी मागणी मुंबई काँग्रेसच्या अध्यक्ष प्रा. वर्षाताई गायकवाड यांनी केली आहे. (varsha gayakwad)

त्याचबरोबर रेल्वे वसाहतीतील कुटुंबांची कायमस्वरूपी पुनर्वसन योजना जोपर्यंत मंजूर होत नाही, तोपर्यंत रेल्वे वसाहतीसुद्धा इतरत्र स्थलांतरित करू नयेत, अशी मागणीदेखील त्यांनी केली आहे.

धारावी पुनर्विकास महाघोटाळा प्रकल्प धारावीकरांचे हक्क पायदळी तुडवत आहे. या महाघोटाळ्यामुळे सात लाखांहून अधिक धारावीकरांना धारावीतून हलवण्याचा कट रचला गेला आहे. ज्यांना ‘पात्र’ म्हणून धारावीतच पुनर्वसन करण्यात येणार आहे, त्यापैकी अनेकांना पूर्ण मालकीचे घर मिळू शकणार नाही.

अदाणी-प्रणित धारावी पुनर्विकास प्रकल्प प्रा.लि. प्रकल्पासाठी वापरल्या जाणाऱ्या रेल्वेच्या जागा पोटभाडेपट्ट्याने देता येणार नाहीत, असे रेल्वेने स्पष्ट केले आहे. याचाच अर्थ या कुटुंबांना मालकी हक्काचे घर मिळणार नाही व त्यांना बेघर करण्याचा हा डाव आहे, हे आम्ही कदापि सहन करणार नाही.

रेल्वेच्या जागेवर अदाणीला काय बांधायचे ते बांधावे; परंतु स्थानिक धारावीकरांचे पुनर्वसन मात्र त्या जागेवर करू नये, असेही गायकवाड यांनी स्पष्ट केले आहे.(maharashtra news)