मुंबई, ता. ४ : सिंगल युज प्लास्टिकवर बंदी असली तरी अजूनही त्याचा वापर होत आहे. याची गंभीर दखल घेत महाराष्ट्र प्रदूषण नियंत्रण मंडळाने एमएमआर परिसरात विशेष मोहीम हाती घेतली असून भरारी पथकांमार्फत कारवाई केली जात आहे.
सिंगल युज प्लास्टिकच्या वापरावर जरी बंदी असली तरी मुंबई महानगर प्रादेशिक कार्यक्षेत्रामध्ये त्याचा वापर होत असल्याचे दिसून येत आहे. याच अनुषंगाने सिद्धेश कदम यांनी मुंबई महानगर प्रादेशिक क्षेत्रातील महाराष्ट्र प्रदूषण नियंत्रण मंडळाच्या प्रादेशिक अधिकाऱ्यांची बैठक घेतली. यावेळी सिंगल युज प्लास्टिकचा वापर हा थांबवण्यासाठी कडक अंमलबजावणीची गरज व्यक्त केली गेली. तसेच मुंबई, मुंबई उपनगर, ठाणे, कल्याण, डोंबिवली, उल्हासनगर, भिवंडी-निजामपूर, नवी मुंबई आणि पनवेल या महापालिका हद्दीत तसेच बदलापूर नगर परिषदेच्या हद्दीत नेमलेल्या भरारी पथकामार्फत प्लास्टिकची साठवणूक, वितरण करणाऱ्या आस्थापनांवर कारवाई करण्यात येणार आहे.