मुंबई, ता. ११ : राज्यातील आदिवासी (अनुसूचित जमाती) विद्यार्थ्यांना गुणवत्तापूर्ण शिक्षण मिळावे, यासाठी राज्यातील नामांकित इंग्रजी माध्यमांच्या शाळांमध्ये पहिली व दुसरीत प्रवेश देण्यासाठीची प्रक्रिया नुकतीच सुरू करण्यात आली असून यासाठी ३१ मेपर्यंत मुदत देण्यात आली आहे. सन २०२४-२०२५ या शैक्षणिक वर्षात आदिवासी विद्यार्थ्यांना शहरातील इंग्रजी माध्यमाच्या नामांकित निवासी शाळेमध्ये इयत्ता पहिली व दुसरीमध्ये प्रवेशासाठी अर्ज करण्यासाठी प्रकल्प अधिकारी एकात्मिक आदिवासी विकास प्रकल्प मुंबई यांनी आवाहन केले आहे. या योजनेकरिता, प्रकल्प अधिकारी एकात्मिक आदिवासी विकास प्रकल्प मुंबई यांच्या कार्यक्षेत्रात येणारे गाव, पाडे येथील अनुसूचित जमातीच्या विद्यार्थ्यांनी आवश्यक कागदपत्रांसह या कार्यालयास ३१ मेपर्यंत अर्ज सादर करावा, असे आवाहन करण्यात आले आहे. यासाठीचा अर्ज या कार्यालयात विनामूल्य उपलब्ध करून देण्यात आल्याचेही सांगण्यात आले.