डॉक्टरांच्या सुरक्षेसाठी टास्क फोर्स तयार करा!
‘आयएमए’ची मागणी; डॉक्टरांवरील हल्ल्यांचे प्रकरण
सकाळ वृत्तसेवा
मुंबई, ता. ४ : देशाच्या पूर्वेकडील तीन वैद्यकीय महाविद्यालयांमध्ये डॉक्टरांविरोधात झालेल्या हिंसक घटनांमुळे डॉक्टरांच्या सुरक्षेचा मुद्दा पुन्हा एकदा तापला आहे. या हल्ल्यांच्या पार्श्वभूमीवर, इंडियन मेडिकल असोसिएशनशी संबंधित ज्युनिअर डॉक्टर्स नेटवर्कने केंद्र सरकारकडे डॉक्टरांच्या सुरक्षेला प्राधान्य देण्याची मागणी केली आहे. एक टास्क फोर्स तयार करून हल्ला किंवा धमकी देणाऱ्यांवर कठोर कारवाई करावी, अशी मागणी केली आहे.
त्रिपुरातील आगरतळा वैद्यकीय महाविद्यालयाच्या निवासी डॉक्टरवर झालेला जीवघेणा हल्ला, ओडिशातील डॉक्टरचे अपहरण आणि बिहारमधील निवासी डॉक्टर आणि सहयोगी प्राध्यापकावर झालेला हिंसक हल्ला यामुळे राज्यासह देशातील सर्व वैद्यकीय महाविद्यालयातील निवासी डॉक्टरांना पुन्हा असुरक्षित वाटू लागले आहे. या तिन्ही घटनांची दखल घेत आयएमएच्या ज्युनिअर डॉक्टरांनी पुन्हा एकदा डॉक्टरांच्या सुरक्षेचा मुद्दा उपस्थित केला आहे.
‘आयएमए जेडीएन’चे राष्ट्रीय संयोजक डॉ. इंद्रनील देशमुख म्हणाले की, यापूर्वी रुग्णालयांमध्ये डॉक्टरांशी हाणामारीच्या घटना घडत असत, मात्र आता थेट डॉक्टरांवर जीवघेणे हल्ले होत आहेत. या हिंसक घटनांमुळे खुद्द निवासी डॉक्टरही होरपळले आहेत. ही भीती दूर करण्यासाठी केंद्र सरकारने कठोर पावले उचलली पाहिजेत.

केंद्रीय आरोग्य सेवा संरक्षण कायदा
काही दिवसांतच स्‍थापन होणाऱ्या नवीन सरकारने संपूर्ण राज्‍यात केंद्रीय आरोग्य संरक्षण कायद्याची काटेकोरपणे अंमलबजावणी करावी, अशी मागणी असल्‍याचे डॉ. इंद्रनील यांनी सांगितले. डॉक्टरांवर हल्ले करणाऱ्यांवर कठोर कारवाई व्हावी, अशा प्रकरणांचा जलद तपास करण्यासाठी टास्क फोर्स किंवा समिती स्थापन करण्याची तरतूद असावी, असेही ते म्‍हणाले.
......
पोलिसांची गस्त नियमित असावी
कडक कायद्यांबरोबरच राज्यासह भारतातील सर्व वैद्यकीय महाविद्यालयांमध्ये स्थानिक पोलिसांकडून नियमित गस्तही असायला हवी. यासोबतच प्रत्येक प्रभागात सीसीटीव्ही कॅमेरे बसवावेत. हे कॅमेरे स्थानिक पोलिस स्टेशन किंवा रुग्णालयाच्या सुरक्षा विभागाशी जोडलेले असावेत, जेणेकरून डॉक्टर वेळेवर पोहोचल्यानंतर सुरक्षा कर्मचाऱ्यांकडून त्यांची सुटका करता येईल. याशिवाय रुग्णालयातील रुग्णांच्या कुटुंबीयांसाठी पास प्रणालीची काटेकोरपणे अंमलबजावणी करावी, असे डॉ. इंद्रनील यांनी सांगितले.