मुंबई, ता. २ : महिला शिक्षणाचा वारसा देशात निर्माण करणाऱ्या श्रीमती नाथीबाई दामोदर ठाकरसी महिला विद्यापीठाचा १०९ वा वर्धापनदिन शुक्रवारी (ता. ५) सकाळी ११ वाजता होणार आहे. या कार्यक्रमाच्या अध्यक्षस्थानी राज्यपाल रमेश बैस असणार आहेत.
स्त्री शिक्षणात विद्यापीठाचे १०८ वर्षांचे महत्त्वपूर्ण योगदान राहिले आहे. सन १९१६ पासून या विद्यापीठाने लाखो स्त्रियांना शिक्षित केल्यामुळे प्रगतीशील समाजाची निर्मिती झाली आहे. सध्या ७० हजारपेक्षा जास्त विद्यार्थिनींनी विद्यापीठाच्या ३९ विभाग, १३ संस्था आणि ३०६ संलग्न महाविद्यालयांमध्ये विविध अभ्यासक्रमांसाठी नोंदणी केली आहे. भारतरत्न महर्षी धोंडो केशव कर्वे यांच्या प्रेरणेतून महिला सक्षमीकरण हे ध्येय असल्याचे विद्यापीठाच्या कुलगुरू डॉ. उज्ज्वला चक्रदेव यांनी सांगितले. या कार्यक्रमाला बीजमाता पद्मश्री राहीबाई सोमा पोपेरे यांच्यासह विद्यापीठाच्या कुलगुरू डॉ. उज्ज्वला चक्रदेव, प्र-कुलगुरू रुबी ओझा, विद्यापीठाचे कुलसचिव विलास नांदवडेकर उपस्थित राहणार आहेत.