विजय मल्ल्याविरोधात अजामीनपात्र वॉरंट

मुंबई, ता. २ ः विविध बँकांची फसवणूक करून कोट्यवधींचे कर्ज थकवणारा मद्यसम्राट विजय मल्ल्याला मुंबई सत्र न्यायालयाने चांगलाच दणका दिला आहे. १८० कोटींच्या कर्ज घोटाळ्याप्रकरणी विशेष न्या. एस. पी. निंबाळकर यांनी मल्ल्याविरुद्ध अजामीनपात्र वॉरंट जारी केले आहे.
मल्ल्याने देशाबाहेर पळ काढून आठ वर्षे उलटल्यानंतर इंडियन ओव्हरसिज बँकेतील १८० कोटींच्या कर्ज घोटाळ्यात त्याच्याविरुद्ध अजामीनपात्र वॉरंट जारी करण्याची विनंती सीबीआयने केली. मल्ल्याने इंडियन ओव्हरसीज बँकेच्या कर्जाची रक्कम जाणूनबुजून थकवली. या कर्ज घोटाळ्यात शिक्षा टाळण्यासाठी तो फरारी आहे. त्याच्या अटकेसाठी न्यायालयाने अजामीनपात्र वॉरंट जारी करावे, असा युक्तिवाद सीबीआयने केला होता. केंद्रीय तपास यंत्रणेची ही विनंती मान्य करीत विशेष न्यायाधीश एस. पी. निंबाळकर यांनी मल्ल्याविरुद्ध अजामीनपात्र वॉरंट जारी केले.