सकाळ वृत्तसेवा
मुंबई, ता.६ ः टी-२० विश्वविजेत्या ठरलेल्या भारतीय क्रिकेट टीममधील खेळाडूंचे गुरुवारी मुंबईत आगमन झाले. यावेळी काढण्यात आलेल्या मिरवणुकीसाठी रस्त्यालगतच्या झाडांची बेसुमार कत्तल केल्याचा आरोप पर्यावरणप्रमींनी केला आहे.
नरिमन पॉईंट येथील ट्रायडंट हॉटेलजवळ झाडे तोडल्याचे धक्कादायक प्रकार घडला आहे. भारतीय क्रिकेट संघाचा रोड शो पाहण्यासाठी हा प्रकार झाला आहे. काही झाडांची थेट कत्तल करण्यात आली आहेत; तर काही झाडे नियमांचे उल्लंघन करून छाटणी केली आहे. याविरोधात पर्यावरणवादी कार्यकर्ते संतोष दौडकर यांनी पालिका आयुक्त डॉ भुषण गगराणी यांच्याकडे तक्रार दाखल केली आहे. तसेच एकीकडे मलबार हिल भागात वृक्षतोडीला विरोध करणाऱ्यांना महापालिका आयुक्त पाठिंबा देतात आणि दुसरीकडे ‘अ’ प्रभागातील विभाग अधिकारी विनाकारण झाडे तोडून पर्यावरणाचे नुकसान करत असल्याचा आरोप त्यांनी केला आहे.