देशभरातील सायबर गुन्ह्यांत सहभागी आरोपीस अटक

मुंबई, ता. २८ : फसव्या शेअर ट्रेडिंग ॲपद्वारे देशभरात अनेकांची कोट्यवधींची फसवणूक करणाऱ्या सायबर भामट्यांच्या टोळीतील एकाला दक्षिण विभाग सायबर पोलिसांनी अटक केली. सिद्धार्थ माहेश्वरी (वय ५०) असे आरोपीचे नाव असून त्याने गुन्ह्यासाठी वापरलेल्या बँक खात्याबाबत देशभरातून ४१ तक्रारी राष्ट्रीय सायबर गुन्हे नोंदणी पोर्टलवर नोंद होत्या. पेडर रोड परिसरात राहणाऱ्या दोन बहिणींची अलीकडेच फसव्या शेअर ट्रेडिंग ॲपद्वारे ३१ लाख रुपयांना फसवणूक झाली होती. त्यांनी ज्या बँक खात्यांमध्ये पैसे जमा केले; त्याआधारे सायबर पोलिस ठाण्याचा (दक्षिण विभाग) तपास सुरू होता. त्यातील एक खाते सिद्धार्थ याचे होते. त्याचा ठावठिकाणा शोधण्यात पोलिस पथकाला यश आले. चार ठिकाणी पाळत ठेवून त्याला अटक करण्यात आली. त्यामुळे देशभरात घडलेल्या अनेक गुन्ह्यांची उकल होऊ शकेल, असा विश्वास पोलिस पथकाला आहे.