बालसुधारगृहात आरोपीवर लैंगिक अत्याचार?
तक्रारीबाबत पोलिस साशंक

मुंबई, ता. २२ : डोंगरी येथील बालसुधारगृहात एका अल्पवयीन आरोपीने आपल्यावर अनैसर्गिक लैंगिक अत्याचार झाल्याची तक्रार केली. कोठडीतील अन्य अल्पवयीन आरोपीने हे अत्याचार केल्याचा आरोप त्याने केला. याप्रकरणी डोंगरी पोलिसांनी सोमवारी पोक्सोनुसार गुन्हा नोंदवला असला तरी तक्रारदाराने सुधारगृहातून सुटकेसाठी बनाव रचल्याचा संशय आहे.
तक्रारदार अल्पवयीन आरोपीस गेल्याच आठवड्यात सहार पोलिसांनी विमानांमध्ये बॉम्बची अफवा पसरवल्याबद्दल अटक केली होती. अकरावीत शिकणारा आरोपी मूळचा छत्तीसगडचा रहिवासी आहे. व्यावसायिक वादातून भागीदार मित्राला अडकविण्याच्या हेतूने मुंबई आंतरराष्ट्रीय विमानतळावरून न्यूयॉर्कसाठी उड्डाण घेतलेल्या विमानासह अन्य दोन विमानांमध्ये सहा किलो आरडीएक्ससह सहा अतिरेकी उपस्थित असल्याची माहिती एक्स हॅण्डलवरून सर्वदूर पसरवली. त्यांनतर उड्डाण घेतलेले विमान दिल्ली तळावर तातडीने उतरविण्यात आले. झाडाझडती घेतल्यावर ती अफवा असल्याचे स्पष्ट झाले होते. उर्वरित दोन विमानांची उड्डाणे झाडाझडती पूर्ण होईपर्यंत पुढे ढकलण्यात आली. याप्रकरणी सहार पोलिसांनी तांत्रिक तपास करत या अल्पवयीन आरोपीस ताब्यात घेत बाल न्यायालयात हजर केले. न्यायालयाने या आरोपीला बालसुधारगृहात पाठवले. या आरोपीच्या तक्रारीनुसार सोमवारी सकाळी नऊच्या सुमारास नैसर्गिक विधीसाठी शौचालयात गेला असताना अन्य अल्पवयीन आरोपीने तोंडात तांबड्या रंगाच्या गोळ्या आणि शुभ्र रंगाची भुकटी कोंबत लैंगिक अत्याचाराचा प्रयत्न केला.
...
याआधीही दोन खोट्या तक्रारी
या तक्रारीनंतर डोंगरी पोलिसांनी लागलीच गुन्हा नोंदवला. तक्रारदार तरुणाची वैद्यकीय चाचणी करून घेण्यात आली. तपासाशी संबंधित एका अधिकाऱ्याने दिलेल्या माहितीनुसार, तक्रारदाराने याआधी अशा प्रकारच्या दोन खोट्या तक्रारी छत्तीसगड येथे केल्या होत्या. तसेच सहार पोलिस ठाण्यात दाखल गुन्ह्यातही कट आखत मित्रावर आळ येईल, अशा पद्धतीने देखावा उभा केला. ही पार्श्वभूमी लक्षात घेता सुधारगृहातून सुटकेसाठी त्याने हा आरोप केला, असा संशय आहे. त्या दृष्टीने तपास सुरू आहे.