६१ वर्षीय महिलेला ९१ लाखांचा गंडा

मुंबई, ता. २९ ः कुरिअरद्वारे मलेशियात अमली पदार्थ, डेबिट कार्ड, पासपोर्ट पाठवल्याने मानवी तस्करीचा गुन्हा नोंद झाल्याचा आभास निर्माण करत सायबर भामट्यांनी ६१ वर्षीय महिलेला ९१ लाख रुपयांचा गंडा घातला. याप्रकरणी २१ नोव्हेंबर रोजी सायबर पोलिस ठाण्यात (उत्तर विभाग) गुन्हा नोंद झाला आहे. ऑगस्ट महिन्यात भामट्यांनी तक्रारदार महिलेला जाळ्यात ओढले. सर्व बचत ठेवी, बँक खात्यांतील जमा रकमेची माहिती घेऊन भामट्यांनी या प्रकरणातून बाहेर पडण्यासाठी टप्प्याटप्प्याने ९१ लाख रुपये उकळले. फसवणूक झाल्याचे लक्षात येताच तिने सायबर पोलिसांत तक्रार दिली.