बेस्टच्या अपघातात
तीन वर्षांत ६२ मृत्यू
भाडेतत्त्वावरील बसमुळे ६५ टक्के जीवितहानी
सकाळ वृत्तसेवा
मुंबई, ता. ११ ः कुर्ला येथे बेस्ट बसच्या अपघातात सात जणांचा मृत्यू, तर ४२ जण जखमी झाले होते. या अपघाताच्या चौकशीसाठी बेस्टने चार सदस्यीय समितीची स्थापना केली आहे. दरम्यान, मागील तीन वर्षांमध्ये बेस्ट बसच्या विविध अपघातांत ६२ जणांचा मृत्यू झाला, तर १७४ जण जखमी झाले. त्यातही भाडेतत्त्वावरील बसमुळे ६५ टक्के मृत्यू झाल्याची माहिती समोर आली आहे.
बेस्ट बसमुळे झालेल्या विविध अपघातांमध्ये वाढ होत असल्याचे आकडेवारीवरून स्पष्ट होत आहे. त्यात कंत्राटी बसमधील अपघात अधिक असून त्यात झालेल्या मृत्यूंची संख्या ही अधिक आहे. त्यामुळे बेस्टचा प्रवास, सुरक्षित प्रवास या ब्रीदवाक्याला आता हरताळ फासल्याचेही दिसत आहे. यामुळे बेस्टमधील कंत्राटीकरण संपवून त्याऐवजी बेस्टने स्वतः बसगाड्या चालवाव्यात, अशी मागणी जोर धरू लागली आहे.
----
बेस्टचे अपघात
एकूण मृत्यू - ६२
बेस्ट बसमुळे मृत्यू - २२
भाडेतत्त्वावरील बसमुळे मृत्यू - ४०
एकूण जखमी - १७४