अपघातात मृत महिलेचे दागिने चोरी?
व्हिडिओ व्हायरल
कुर्ला अपघातात एकीकडे जात-धर्म विसरून माणुसकी म्हणून जखमींना तत्काळ रुग्णालयात दखल करण्याची धावपळ दिसली, तर दुसरीकडे बुधवारी (ता.११) व्हायरल झालेल्या एका व्हिडिओद्वारे अनोळखी व्यक्तीने मृत महिलेच्या हातातील सोन्याचे दागिने काढून घेतल्याचा प्रकारही समोर आला.

अपघातग्रस्त बसने डॉ. आंबेडकर नगर येथे कमनीला धडकून थांबण्याआधी फातिमा अन्सारी या महिलेला चिरडले होते. ही महिला नगराला लागून असलेल्या देसाई क्लिनिकमध्ये आया म्हणून काम करते. बसखाली तिचा मृतदेह अडकून पडला होता. जमलेली गर्दी तो बाहेर काढण्याच्या बेतात असताना एक हेल्मेटधारी तरुण तेथे आला आणि त्याने फातिमा यांच्या हातातील सोन्याच्या बांगड्या उतरविण्यास सुरुवात केली. गर्दीतून त्यास विरोधही केला गेला, मात्र या महिलेचा मोबाइल फोन माझ्याकडेच आहे. तिच्या घरच्यांचा फोन आला तर मोबाइलसोबत तिचे दागिनेही देईन, असे हा तरुण सांगताना दिसतो. या घटनेची माहिती हा व्हिडिओ व्हायरल झाल्यावर पोलिसांना मिळाली. तत्पूर्वी फातिमा यांच्या कुटुंबाने मृतदेहासोबत नेहमीचे दागिने नाहीत, असा दावा केल्याचे समजते. या प्रकरणी कुर्ला पोलिस अधिक तपास करीत आहेत.

बसमधील प्रवाशांचा शोध सुरू
अपघातग्रस्त बसमधून प्रवास करणाऱ्या प्रवाशांकडे पोलिसांना चौकशी करायची आहे. त्यांच्या विशेषतः चालक संजय मोरे यांच्या शेजारी किंवा मागील बाजूस बसलेल्या, उभ्याने प्रवास करणाऱ्या प्रवाशांचा जबाब तपासाच्या दृष्टीने महत्त्वाचा ठरेल, असा अंदाज पोलिसांना व्यक्त केला आहे.

बसमधील सीसीटीव्ही चित्रण ताब्यात
पोलिसांनी अपघातग्रस्त बसमधील सीसीटीव्ही चित्रण तपासासाठी ताब्यात घेतले आहे. या चित्रणात बस सुरू झाल्यापासून कमानीला धडकून थांबेपर्यंतचे चित्रण आहे. बसच्या हेलकाव्यांमुळे आणि काचेतून दिसणाऱ्या भीषण नजाऱ्यामुळे आतील प्रवाशांची उडालेली भंबेरी, तोल सांभाळण्यासाठी सुरू असलेली धडपड स्पष्ट दिसते आहे.