आरबीआयला रशियन भाषेत धमकीचा ई-मेल

मुंबई : रिझर्व्ह बँकेला ई-मेलद्वारे बॉम्बने उडवण्याची धमकी देणाऱ्या अनोळखी व्यक्तीविरोधात माता रमाबाई आंबेडकर मार्ग पोलिसांनी गुरुवारी (ता. १२) गुन्हा नोंदवला. पोलिसांनी दिलेल्या माहितीनुसार गुरुवारी दुपारी एक वाजण्याच्या सुमारास बँकेच्या अधिकृत ई-मेल आयडीवर रशियन भाषेतील धमकीचा ई-मेल प्राप्त झाला. बँक प्रतिनिधीने याबाबत पोलिस दलातील वरिष्ठ अधिकाऱ्यांना कळवले. पुढे एमआरए मार्ग पोलिसांनी याप्रकरणी गुन्हा नोंदवत तपास सुरू केला आहे. धमकी रशियन भाषेत असली तरी ई-मेल कोणी, कुठून पाठवला याचा तपास पोलिस सायबर विभागाच्या मदतीने करणार आहेत.