मुंबई, ता. ७ ः पी. डिमेलो मार्गावर गोळीबार करत सशस्त्र लूटमार करणाऱ्या दोघांना पोलिसांनी अटक केली आहे. या प्रकरणात आरोपींकडून लुटीतील १६.५० लाखांचा ऐवज पोलिसांनी हस्तगत केला असून, अन्य आरोपींचा शोध सुरू आहे.
सराफा व्यवसायासोबत अंगडीया सेवा पुरवणारे चिराग धंदुकीया सोमवारी रात्री ४७ लाखांचे दागिने गोव्याला पोच करण्यासाठी कोकण रेल्वेने प्रवास करणार होते. काळबादेवी येथील कार्यालयातून रात्री दहाच्या सुमारास त्यांच्यासोबत त्यांचा पुतण्या आणि अन्य एक व्यक्ती दुचाकीवर होता. पी. डिमेलो मार्गावरील छत्रपती शिवाजी महाराज टर्मिनसच्या फलाट क्रमांक १८ जवळील प्रवेशद्वारावर दागिन्यांची बॅग हिसकावण्याचा प्रयत्न झाला, पण दुचाकीवर मागे बसलेल्या चिरागच्या पुतण्याने प्रतिकार केल्यामुळे आरोपींनी दोन गोळ्या झाडत बॅग हिसकावून पळ काढला होता. या प्रकरणात पोलिस उपायुक्त डॉ. प्रवीण मुंढे, सहाय्यक आयुक्त तन्वीर शेख, वरिष्ठ निरीक्षक संतोष धनवटे यांनी तातडीने पोलिस पथके नेमली होती. सीसीटीव्ही चित्रणाआधारे ओळख पटलेल्या दोघांना काळबादेवी परिसरातून अटक करण्यात आली.
------------------------------------------------------------
आरोपींची गुन्हेगारी पार्श्वभूमी
किरण धनावडे, अरुण मढीया ऊर्फ घाची अशी आरोपींची नावे असून, त्यांची गुन्हेगारी पार्श्वभूमी आहे. या दोघांनी त्यांच्या अन्य साथीदारांसोबत काळबादेवी येथूनच चिरागचा पाठलाग सुरू केल्याची माहिती तपासातून पुढे आली आहे.