शहरात अवजड वाहतूक सुरूच
सकाळी सात ते रात्री १२ पर्यंत प्रवेशबंदीचे उल्‍लंघन; वाहनचालकांसह प्रवासी त्रस्‍त
सकाळ वृत्तसेवा
मुंबई, ता. १६ : निर्बंध लादूनही मुंबई शहरासह उपनगरांमध्ये अवजड वाहनांची सर्रास वाहतूक सुरू असल्‍याचे दिसते. त्‍यामुळे प्रत्येक रस्त्यावर वाहतूक कोंडी होत असून, वाहतूक विभागाने अशा वाहनांवर कठोर कारवाई करावी, अशी मागणी वाहनचालकांसह प्रवासी करीत आहेत.
मुंबई शहरामध्ये प्रत्‍येक दिवशी नवी वाहने दाखल होत आहेत. तसेच देशाची आर्थिक राजधानी असलेल्‍या या शहराची लोकसंख्यादेखील दिवसेंदिवस वाढत चालली आहे. त्‍या प्रमाणात वाहतुकीचे नियोजन नसल्‍याने शहरातील सर्वच भागात वाहनांच्या रांगा लागलेल्‍या असतात. यावर तोडगा काढण्यासाठी वाहतूक पोलिसांनी सकाळी सात ते रात्री १२ पर्यंत अवजड वाहनांना मुंबईत प्रवेशबंदी केली आहे. तरीही अवजड वाहने शहरात बंदीच्या काळात फिरताना दिसतात. नियमांचे उल्लंघन होऊनही त्याकडे सर्रास दुर्लक्ष केले जात आहे. बंदीच्या काळात ओव्हरलोड वाहनांचीही वाहतूक सुरू असते. सकाळ, संध्याकाळ कोंडी होत असल्याने नोकरदारांना कार्यालय आणि घरी जाण्यास नेहमी उशीर होतो.
मुंबईत मेट्रोच्या कामांमुळे रस्ते अनेक ठिकाणी खोदले असल्याने वाहतुकीच्या मार्गिका कमी झाल्या आहेत. काही रस्ते एकदिशा मार्ग केले आहेत, तर काही ठिकाणची वाहतूक अन्य मार्गांवरून वळवली आहे. यावर तोडगा काढण्यासाठी मुंबई वाहतूक पोलिसांनी अवजड वाहनांना शहरात प्रवेश करण्यासाठी वेळापत्रक आखून दिले आहे. सकाळी आणि संध्याकाळी गर्दीच्यावेळी प्रवेशबंदी करण्यात आली आहे. तसेच काही मार्गांवर प्रवेशबंदी आहे, मात्र तरी त्या मार्गावरून मालवाहतूक केली जाते.

काय आहे वाहतूक पोलिसांचा आदेश?
दक्षिण मुंबईत अवजड वाहनांना सकाळी सात ते रात्री १२ पर्यंत प्रवेशबंदी आहे. या वाहनांना रात्री एकनंतर सकाळी सातपर्यंत जाण्यास परवानगी आहे, तर दक्षिण मुंबई वगळता अन्य भागांत अवजड वाहनांना सकाळी सात ते ११ आणि सायंकाळी पाच ते १० या वेळेत प्रवेशावर निर्बंध आहेत. या आदेशातून आपत्कालीन वाहने आणि सरकारी वाहने, एसटी, बेस्ट, स्कूल बस, प्रायव्हेट कंपन्यांच्या कर्मचारी बस, अत्यावश्यक सेवा देणारी वाहने, पोलिस, रुग्णवाहिका, अग्निशमन दलाच्या गाड्यांना यातून सूट देण्यात आली आहे.

मुंबईत अवजड वाहनांना वाहतुकीसाठी वेळेची मर्यादा निश्चित करण्यात आली आहे. नियमांचे उल्लंघन केले जात असल्‍यास संबंधित विभागातील अधिकाऱ्यांना कारवाईचे आदेश देण्यात येतील. तसेच कारवाईसाठी विशेष मोहीम राबविण्यात येईल.
- एम. रामकुमार,
अपर पोलिस आयुक्त

पश्‍चिम द्रुतगती महामार्ग, पूर्व द्रुतगती महामार्ग, फ्रीवे या रस्‍त्‍यांवर अवजड वाहतूक सुरू आहे. ही वाहने क्षमतेपेक्षा अधिक वाहतूक करतात. त्यामुळे रस्त्याचे नुकसान होत असून, अपघाताचा धोका आहे, मात्र त्याकडे वाहतूक पोलिसांचे आणि परिवहन विभागाचे दुर्लक्ष होत आहे.
प्रदीप वाघमारे,
अवजड वाहतूक विभागप्रमुख, महाराष्ट्र नवनिर्माण वाहतूक सेना