पाच-सहा महिन्यांत
कर्करोगावरील लस
आरोग्य राज्यमंत्री प्रतापराव जाधव यांची घोषणा
सकाळ वृत्तसेवा
मुंबई, ता. १९ : देशात कर्करोगाच्या रुग्णांची संख्या वाढत असून, विशेषतः महिलांमध्ये त्याचे प्रमाण लक्षणीय आहे. या पार्श्वभूमीवर महिलांमधील कर्करोगाला आळा घालणारी लस येत्या पाच-सहा महिन्यांत उपलब्ध होईल. ही लस नऊ ते १६ वयोगटातील मुलींना दिली जाणार असल्याची माहिती केंद्रीय आरोग्य राज्यमंत्री प्रतापराव जाधव यांनी दिली.
कर्करोगाची वाढती रुग्णसंख्या नियंत्रित करण्यासाठी केंद्र सरकार पावले उचलत आहे. त्यानुसार ३० वर्षांवरील महिलांची आरोग्य तपासणी केली जाणार आहे. कर्करोगाचे लवकर निदान करण्यासाठी डे केअर कॅन्सर सेंटर तयार केले जाणार आहेत. तसेच कर्करोग प्रतिबंधासाठी लस उपलब्ध केली जाणार आहे. लशीच्या संशोधनाचे काम पूर्ण झाले असून, सध्या चाचण्या सुरू आहेत. पुढील पाच ते सहा महिन्यांत ही लस उपलब्ध होईल. नऊ ते १६ वयोगटातील मुली या लशीसाठी पात्र असतील, अशी माहिती प्रतापराव जाधव यांनी दिली.