मोबाईल, मेसेज, लाइफ पार्टनरमुळे ४९ टक्‍के मुंबईकरांचा निद्रानाश
सहा तासांपेक्षाही मिळते कमी झोप
सकाळ वृत्तसेवा
मुंबई, ता. १२ : मोबाईल, मेसेज आणि लाइफ पार्टनरमुळे ४९ टक्‍के मुंबईकरांचा रात्री निद्रानाश होत असून, ते सहा तासांपेक्षा कमी झोपतात.  ४९ टक्‍के मुंबईकरांना मोबाईलवरील मेसेज आणि आयुष्यातील जोडीदारामुळे रात्री कमी झोप मिळते.  मात्र चांगल्या आरोग्यासाठी दररोज सात ते आठ तासांची झोप आवश्यक आहे.
महानगरात केवळ ४२ टक्के लोक आहेत, ज्यांना सहा ते आठ तासांची झोप मिळते. ‘लोकल सर्कल’ संस्थेच्या सर्व्हेमध्ये ही बाब पुढे आली आहे. शुक्रवारी (ता. १४) होणाऱ्या जागतिक झोप दिवसानिमित्त या खासगी संस्थेने हे सर्वेक्षण केले आहे.
योग्य अंथरुण नसणे, घरातील कामाचा ताण, स्लीप एपनिया (आजार) आणि लहान मुलांनाही कमी झोपेसाठी कारणीभूत असल्याचे सांगण्यात आले आहे. आरोग्यावर परिणाम होऊन अनेक आजारांना आमंत्रण मिळते. चिडचिड आणि मानसिक आजाराला बळी पडण्याची शक्यता आहे. अंगदुखी, जडपणा, थकवा यासारख्या समस्या उद्‌भवतात. पचनावरही परिणाम होतो. त्यामुळे बद्धकोष्ठता निर्माण होते. एकाग्रता आणि स्मरणशक्ती दोन्ही कमकुवत होण्याची शक्यता असते. झोपेच्या कमतरतेमुळे डोके जड होण्याची समस्या कायम राहते. कमी झोपणाऱ्या लोकांना वजन वाढण्याची समस्यादेखील भेडसावते.

फक्त ४२ टक्‍के लोक सहा ते आठ तास झोपतात
मुंबईतील ५ हजार ५७२ लोकांचे मत जाणून घेण्यात आले. ‘लोकल सर्कल’चे संस्थापक सचिन तापडिया यांनी सांगितले की, मुंबईसह देशातील ३४८ जिल्ह्यांमध्ये हे सर्वेक्षण करण्यात आले आहे. राष्ट्रीय स्तरावर ४३ हजार लोक सहभागी झाले होते. यामध्ये ५ हजार ५७२ मुंबईकरांचाही समावेश आहे. गेल्या १२ महिन्यांत रात्री किती तासांची अखंड झोप घेतली, झोपेचा त्रास होण्याचे कारण काय, पुरेशी झोप घेण्यासाठी तुम्ही काय करता असे प्रश्‍न सर्वेक्षणात सहभागी लोकांना विचारण्यात आले.

दोन टक्‍के लोक आठ ते १० तास झोपतात
सर्वेक्षणातील सात टक्के सहभागी झालेल्‍या लोकांनी सांगितले, की ते फक्त चार तास झोपतात. दोन टक्के सहभागींनी सांगितले, की ते आठ ते १० तास झोपतात. तर ४२ टक्के लोकांनी ते सहा ते आठ तास झोपतात, असे सांगितले.

डास, बाहेरील आवाजही कारणीभूत
१९ टक्‍के मुंबईकरांनी सांगितले की, मोबाईलवरील मेसेजमुळे त्यांची झोप भंग पावते. ४४ टक्‍के लोकांनी सांगितले की एक किंवा अधिक वेळा शौचालयात गेल्याने त्यांची झोप भंग पावते. याशिवाय १२ टक्के लोकांनी कमी झोपेसाठी डास किंवा बाहेरून येणारा आवाज यांना जबाबदार धरले.

आठवड्याच्या शेवटी झोपेचा कोटा पूर्ण करतात
सर्वेक्षण केलेल्या २० टक्‍के सहभागींनी सांगितले, की ते शनिवार व रविवार किंवा सुट्टीच्या दिवशी खूप झोपतात. तसेच ३४ सहभागींनी झोपेची भरपाई होत नाही, असे सांगितले.