मुंबईचे तापमान घटण्याचा अंदाज

मुंबई, ता. २७ : मुंबईतील किमान तापमानात घट होणार असल्याने मुंबईकरांची उन्हाच्या चटक्यातून सुटका होणार आहे. कमाल तापमान ३३ अंशांवरून ३१ अंशांवर येण्याची शक्यता कुलाबा वेधशाळेने व्यक्त केली आहे. वेधशाळेने पुढील २४ तासांसाठी वर्तविलेल्या अंदाजानुसार, तापमानात साधारणतः दोन अंशांची घट होईल. शहर आणि उपनगरांत आकाश मुख्यतः निरभ्र राहील. कमाल आणि किमान तापमान अनुक्रमे ३१ अंश सेल्सिअस आणि २२ अंश सेल्सिअस राहण्याची शक्यता आहे. पुढील तीन दिवस ही स्थिती राहील.