मुंबई एसटी विभागातर्फे
१९ जादा बसफेऱ्या
सकाळ वृत्तसेवा  
मुंबई, ता.  ३० : शाळांना उन्हाळ्याच्या सुट्ट्या लागल्यानंतर अनेक जण कुटुंबासह गावी किंवा इतरत्र फिरण्याचे बेत आखतात. त्यामुळे या प्रवाशांची गैरसोय टाळण्यासाठी महाराष्ट्र राज्य परिवहन महामंडळाची ‘लाल परी’ सज्ज झाली आहे. १५ एप्रिल ते १५ जून या कालावधीत १९ जादा बस सोडण्याचे नियोजन मुंबई एसटी विभागाने केले आहे.
 मुंबई सेंट्रल, परळ, कुर्ला, पनवेल आणि उरण या पाच  एसटी आगारांतून जादा गाड्यांचे नियोजन करण्यात आले आहे. या जादा बसमध्ये सरकारी सवलतींचा लाभदेखील मिळणार असल्याची माहिती एसटी विभागाने दिली.
उन्हाळ्याची सुट्टी लक्षात घेऊन प्रवाशांची गर्दी होणाऱ्या मार्गावर १५ एप्रिल २०२५ पासून टप्प्याटप्प्याने बसगाड्यांच्या जादा फेऱ्या सुरू करण्यात येणार आहेत. एसटीच्या मध्यवर्ती कार्यालयाने या काळात राज्यातील विविध मार्गांवर ७६४ जादा बसफेऱ्या चालविण्यास मंजुरी दिली आहे. उन्हाळ्याच्या सुट्टीतील जादा बसगाड्यांचे तिकीट आरक्षण संगणकीय पद्धतीने उपलब्ध करण्यात आले आहे. एसटी महामंडळाचे अधिकृत संकेतस्थळ, मोबाइल ॲप, बसस्थानकांवरील आरक्षण केंद्रांवर ही सुविधा उपलब्ध करण्यात आली आहे.
----------------
आगार - फेऱ्या 
मुंबई सेंट्रल - ४
परळ - ४  
कुर्ला - ४  
पनवेल - १  
उरण -  ६