मुंबई विद्यापीठ ‘कव्वाली’त प्रथम
आंतरविद्यापीठ राष्ट्रीय स्पर्धेतील यश

मुंबई, ता. ३० ः भारतीय विद्यापीठ संघाच्या वतीने आयोजित केलेल्या सातव्या आंतरविद्यापीठ राष्ट्रीय कव्वाली स्पर्धेत मुंबई विद्यापीठाने प्रथम क्रमांक पटकावून गौरवास्पद कामगिरी केली आहे. हरियाना येथील महर्षी मार्कंडेश्वर विद्यापीठ येथे २८ व २९ मार्चला या स्पर्धेचे आयोजन करण्यात आले होते. या राष्ट्रीय कव्वाली स्पर्धेत भारतातील २३ विद्यापीठे सहभागी झाली होती.
मुंबई विद्यापीठाच्या कलाकारांनी आपल्या उत्कृष्ट गायनशैलीने आणि सादरीकरणाने परीक्षकांची मने जिंकली. या स्पर्धेत त्यांच्या या देदीप्यमान कामगिरीमुळे मुंबई विद्यापीठाच्या शिरपेचात आणखी एक मानाचा तुरा रोवला गेला आहे. मुंबई विद्यापीठाच्या या यशाबद्दल कुलगुरू प्रा. रवींद्र कुलकर्णी, प्र. कुलगुरू प्राचार्य डॉ. अजय भामरे, कुलसचिव डॉ. प्रसाद कारंडे आणि विद्यार्थी विकास विभागाचे संचालक डॉ. सुनील पाटील यांनी विजयी चमूचे अभिनंदन करून शुभेच्छा दिल्या. या स्पर्धेतील मुंबई विद्यापीठाच्या सहभागामुळे विद्यार्थ्यांच्या कलागुणांना प्रोत्साहन मिळाले तसेच भारतीय संस्कृतीतील कव्वाली या समृद्ध परंपरेचे महत्त्व अधोरेखित झाले. या स्पर्धेत शुधांशू सोमण, निधी खाडिलकर, आर्या गोडबोले, मयूरेश वानखडे, मायकल जोश, सृष्टी जगताप, हर्षकिरण परिहार, तन्मय म्हात्रे, तुषार शिरसाट आणि मयूर मगरे हे विद्यार्थी सहभागी झाले होते. चमू व्यवस्थापक म्हणून सांस्कृतिक समन्वयक नीलेश सावे आणि साहिल जोशी यांनी काम पाहिले.