आर्थिकदृष्ट्या गरजूंना २२ कोटींची मदत

सकाळ वृत्तसेवा
मुंबई, ता. २ : राज्यातील आर्थिकदृष्ट्या गरजूंसाठी मुख्यमंत्री सहाय्यता निधी व धर्मादाय रुग्णालय मदत कक्षाच्या माध्यमातून मोठ्या प्रमाणावर अर्थसहाय्य दिले जाते. मार्च महिन्यात मुख्यमंत्री सहाय्यता निधी कक्षामार्फत तब्बल २,५१७ रुग्णांना तब्बल २२ कोटींहून अधिकची मदत करण्यात आली असून सर्वाधिक मदत ही मेंदू विकारांवरील उपचारांसाठी करण्यात आली असल्याची माहिती कक्षप्रमुख रामेश्वर नाईक यांनी दिली आहे.
मार्च महिन्यात मेंदू विकारांवरील उपचारांसाठी ४७१ रुग्णांना मदत करण्यात आली. तसेच कर्करोगावरील उपचारांसाठी ४२१ रुग्णांना, हिप रिप्लेसमेंटच्या ३०६ रुग्णांना, अपघातामधील शस्त्रक्रियेसाठी २४७ रुग्णांना, हृदयविकारांवरील उपचारांसाठी २३९ रुग्णांना, अपघातांसंबंधित १८४ रुग्णांना, गुडघाबदलासाठी १५० रुग्णांना, बालरोगांवरील उपचारांसाठी १४५ रुग्णांना आर्थिक सहाय्य प्रदान करण्यात आले. मुख्यमंत्री सहाय्यता निधी कक्षाच्या माध्यमातून अधिकाधिक गरजू रुग्णांपर्यंत सहाय्याची रक्कम पोहोचवली जात आहे. ‘समाजातील दानशूर व्यक्तींनीदेखील मुख्यमंत्री सहाय्यता निधी कक्षास सढळ हाताने मदत करावी, जेणेकरून मुख्यमंत्री सहाय्यता निधीच्या माध्यमातून अधिकाधिक रुग्णांना आर्थिक मदत करता येईल. राज्यातील गरजू रुग्णांनी आणि त्यांच्या कुटुंबीयांनी कक्षाद्वारे देण्यात येणाऱ्या सुविधांचा लाभ घ्यावा. तसेच या कक्षाद्वारे देण्यात येणाऱ्या मदतीची माहिती गरजूंपर्यंत पोहोचवण्यासाठी समाजातील संवेदनशील घटकांनी पुढाकार घ्यावा,’ असे आवाहन कक्षप्रमुख रामेश्वर नाईक यांनी केले आहे.