केईएम रुग्णालयात अत्याधुनिक ओपीजी मशीन
दातांच्या उपचारांसाठी फायदेशीर, पालिकेच्या रुग्णालयात पहिल्यांदाच उपकरण
सकाळ वृत्तसेवा
मुंबई, ता. ८ : परळ येथील पालिकेच्या केईएम रुग्णालयात नुकतेच एक अत्याधुनिक ऑर्थोपँटोमोग्राफी (ओपीजी) मशीन बसवण्यात आले आहे. हे मशीन पालिकेच्या इतर वैद्यकीय महाविद्यालयांत बसवले जाणारे पहिले ओपीजी मशीन आहे. त्‍यामुळे दातांवर उपचार करण्यासाठी हे मशीन फायदेशीर ठरणार आहे.
एक विशेष प्रकारचे हे एक्स-रे मशीन असून दात, जबडा आणि संबंधित संरचनांची संपूर्ण पॅनोरॅमिक प्रतिमा मिळविण्यासाठी वापरले जाते. या यंत्राच्या मदतीने संपूर्ण जबड्याचे एकाचवेळी छायाचित्र काढणे शक्य आहे.
दातांचे अस्तर, वाढ किंवा कोणतेही दात गहाळ होणे इत्यादी उघड करणे. सांधे आणि हाडांची स्थिती तपासली जाऊ शकते. त्‍यामुळे काही फ्रॅक्चर किंवा असामान्यता आहेत का ते समजेल. पोकळी, संसर्ग, सिस्ट, ट्यूमर इत्यादींची ओळखदेखील मशीनद्वारे निश्चित केली जाईल. हे मशीन ऑर्थोडोंटिक आणि सर्जिकल नियोजनात मदत करेल.
ओपीजीला ऑर्थोपँटोमोग्राम म्हणतात. हा एक एक्स-रे प्रकार आहे, जो एकाचवेळी सर्व दात दाखवतो. तसेच आजूबाजूचे हाड, मज्जातंतू, सांधे, जबड्याचे सायनस दाखवतो. हे सर्व एकाच वेळी होत असल्याने वैयक्तिक दातांचे एक्स-रे काढावे लागत नाहीत. रुग्णाला रेडिएशन कमी लागते. कारण ते छातीच्या एक्स-रेच्या एक्सपोजरच्या तुलनेत कमी असते.

महत्त्वाचे निदान साधन
रुग्णांच्या दंत समस्यांचे निदान करण्यास आणि त्यानुसार उपचार करण्यास अत्याधुनिक ओपीजी मशीन मदत करेल. प्रभावित अक्कल दाढेचे निदान करण्यात ते उपयुक्त आहे. अधिष्ठाता डॉ. संगीता रावत यांच्या सहकार्यामुळे ही मशीन उपलब्ध झाले असल्‍याचे दंतचिकित्सा विभागाच्या प्राध्यापक आणि प्रमुख ओरल आणि मॅक्सिलोफेशियल सर्जन डॉ. नंदा पै यांनी सांगितले.