कोकणी माणसावर उद्धव ठाकरे यांचे बेगडी प्रेम : दीपक केसरकर

सकाळ वृत्तसेवा
मुंबई, ता. ९ : मुख्यमंत्री असताना कोकणच्या भल्याचा एकही निर्णय न घेणाऱ्या उद्धव ठाकरे यांचे कोकणी माणसावर बेगडी प्रेम असल्याची खरमरीत टीका शिवसेनेचे मुख्य प्रवक्ते दीपक केसरकर यांनी बुधवारी (ता. ९) केली. बाळासाहेब भवन येथे आयोजित पत्रकार परिषदेत ते बोलत होते.
केसरकर म्हणाले की, ‘कोकणातील शेतकऱ्यांसाठी काजू बोर्डाच्या संदर्भात महाविकास आघाडी सरकारने समिती नेमली होती. तेव्हा अर्थराज्यमंत्री या नात्याने या समितीचे आपण अध्यक्ष होतो. काजूचे धोरण कोकणचा कायापालट करणारे धोरण होते, मात्र अडीच वर्षांच्या काळात तत्कालीन मुख्यमंत्री उद्धव ठाकरे यांनी कधीही त्या धोरणाला मंजुरी दिली नाही. यावरून उद्धव ठाकरेंना दुर्लक्षित कोकणाबद्दल किती आत्मीयता होती, हे जवळून अनुभवले. कोकणाच्या विकासासाठी उद्धव ठाकरेंनी एक शब्ददेखील टाकला नाही, ही वस्तुस्थिती आहे. कोकणी माणसावर त्यांचे केवळ बेगडी प्रेम आहे, त्याउलट एकनाथ शिंदे यांनी मुख्यमंत्री झाल्यावर लगेच काजू बोर्डाला १५०० कोटींचा निधी दिला, काजू बोंडाशी संबंधित उद्योगांबाबतचा प्रयोग यशस्वी झाल्यास कोकणातील काजू उत्पादक शेतकऱ्यांना ३००० कोटींचा फायदा होईल,’ असे केसरकर म्हणाले.