‘एल्फिन्स्टन’ वाहतुकीसाठी बंद!
मुंबई, ता ९ : अटल सेतूला वांद्रे-वरळी सी लिंकशी जोडण्यासाठी वरळी-शिवडी एलिव्हेटेड मार्गाचे काम एमएमआरडीने हाती घेतले आहे. या कामासाठी एल्फिन्स्टन रेल्वे पुलाच्या पाडकामासाठी गुरुवार, १० एप्रिलपासून वाहतूक पोलिसांची परवानगी एमएमआरडीएने मागितली आहे. तत्पूर्वी वाहतूक पोलिसांनी पूल बंद करण्यासंदर्भात नागरिकांकडून १३ एप्रिलपर्यंत हरकती आणि सूचना मागितल्या आहेत. त्यानंतर हा पूल वाहतुकीसाठी बंद केला जाणार आहे.

वाहतूक पोलिसांनी या मार्गावर वाहतूक बदल केले आहेत. यामध्ये दादर पश्चिमकडे जाणारी वाहने मडके बुवा चौक येथून उजवे वळण घेऊन डॉ. बाबासाहेब आंबेडकर रोडने खोदादाद सर्कल येथून डावे वळण घेऊन टिळक ब्रिजमार्गे जातील. तर प्रभादेवी व वरळीकडे जाणारी वाहने मडके बुवा चौक सरळ घेऊन डॉ. बाबासाहेब आंबेडकर रोडने कृष्णनगर जंक्शन-परेल वर्कशॉप-सुपारी बाग जंक्शन- भारत माता जंक्शन उजवे वळण घेऊन महादेव पालव मार्गाने करी रोड रेल्वे ब्रिजवरून शिंगटे मास्तर चौकावरून उजवे वळण घेऊन लोअर परेल ब्रिजमार्गे जातील. तर प्रभादेवी पुलामार्गे परेल परिसराकडे जाणारी वाहने संत रोहिदास चौक (प्रभादेवी जंक्शन) येथून लोअर परेल पुलामार्गे करी रोड रेल्वे पुलावरून भारत माता जंक्शन येथून जातील. दुसरीकडे सेनापती बापट मार्गाने प्रभादेवी पुलामार्गे सायन, माटुंग्याकडे जाणारी वाहने सेनापती बापट मार्गावरून डावे वळण घेऊन व्ही. एस. मटकर मार्ग व बाबुराव परुळेकर मार्ग येथून उजवे वळण घेऊन भवानी शंकर रोडने पुढे कबुतरखाना येथून पुढे टिळक पुलामार्गे खोदादाद सर्कल येथून जातील.