मुंबईत पावसाची शक्यता
मुंबई, ता. १३ : राज्यात काही ठिकाणी उन्हाच्या झळा वाढल्या असताना काही ठिकाणी मात्र पावसाचा इशारा देण्यात आला आहे. यात मुंबईतदेखील पावसाची शक्यता व्यक्त करण्यात आली असून पुढील दोन दिवसांत पावसासाठी पोषक वातावरण तयार होण्याचा अंदाज हवामान विभागाने व्यक्त केला आहे.
राज्यात बऱ्याच ठिकाणी कमाल तापमानात वाढ झाली आहे. यात काही ठिकाणी कमाल तापमान ४० अंशांकडे जात असताना काही परिसरामध्ये मात्र पावसाळी वातावरण तयार झाले आहे. राजस्थानच्या पश्चिमेपासून विदर्भाच्या उत्तरेपर्यंत कमी दाबाचा पट्टा तयार झाला आहे. यामुळे तयार होणाऱ्या स्थितीमुळे राज्यात पावसासाठी पोषक वातावरण निर्माण झाले आहे. वाढत्या उष्णतेमुळे बाष्पीभवनाच्या प्रक्रियेलाही वेग आला आहे. त्यामुळे राज्यातील काही भागात पावसाच्या हलक्या सरींनी हजेरी लावली असल्याची माहिती हवामान विभागाने दिली. दरम्यान, मुंबईतही पुढील एक ते दोन दिवसांत हलक्या पावसाचा अंदाज व्यक्त करण्यात आला आहे. या कालावधीत वातावरणही ढगाळ राहील, त्यामुळे काहीसा उकाडाही जाणवेल. यावेळी ३० ते ४० किमी प्रतितास वेगाने वारे वाहतील. मुंबईसह कोकणातील सिंधुदुर्ग, रायगड, ठाणे आणि पालघर जिल्ह्यात काही ठिकाणी हलक्या ते मध्यम पावसाचा अंदाज व्यक्त करण्यात आला आहे.