एल्फिन्स्टन पूल सुरूच राहणार
मुंबईकरांना तूर्तास दिलासा

सकाळ वृत्तसेवा
मुंबई, ता. १५ : वरळी-शिवडी कनेक्टरसाठी एल्फिन्स्टन पुलाची पुनर्बांधणी करण्यात येणार असून, त्यासाठी हा पूल वाहतुकीसाठी दोन वर्षे बंद ठेवण्यात येणार आहे. १६ एप्रिलपासून वाहतूक वळविण्यात येणार होती; मात्र उद्यापासून वाहतूक बदल लागू नसतील, अशी माहिती वाहतूक पोलिसांनी दिली.
एल्फिन्स्टन पुलाबाबत बुधवारपासून (ता. १६) वाहतूक वळविण्यात येणार होती; मात्र वाहतूक वळविण्याचा निर्णय पुढे ढकलण्यात आला आहे, असे वाहतूक विभागाचे उपायुक्त समाधान पवार यांनी सांगितले. जुना पूल पाडून त्या ठिकाणी डबलडेकर पुलाची निर्मिती एमएमआरडीएच्या माध्यमातून होणार आहे. या पुनर्बांधणीच्या कामामुळे मोठी वाहतूक कोंडी होणार असल्याने पुलाच्या नियोजित पाडकामाबाबत १३ एप्रिलपर्यंत सूचना-हरकती मागवण्यात आल्या. नागरिकांनी हरकती न घेतल्यास वाहतूक बंद करून पाडकामाला सुरुवात होणार होती; मात्र सोमवारी (ता. १४) झालेल्या बैठकीत पुन्हा मंगळवारी (ता. १५) बैठक घेण्याचे ठरले. त्यानुसार बैठक झाली; मात्र मंगळवारीही अंतिम निर्णय होऊ शकला नाही. त्यामुळे सध्यातरी पुलावरील वाहतूक ‘जैसे थे’ राहणार आहे.