हार्बर मार्गावरील स्थानकांचा लूक बदलतोय!
हार्बर मार्गावरील स्थानके टाकताहेत कात
प्रवाशांना मिळणार आकर्षक आणि आधुनिक सुविधांचा अनुभव
सकाळ वृत्तसेवा
मुंबई, ता. १३ : देशभरातील रेल्वेस्थानकांच्या रुपड्यांत आमूलाग्र बदल घडवून आणण्यासाठी सुरू करण्यात आलेल्या अमृत भारत स्थानक विकास योजनेअंतर्गत विविध विकासकामे युद्धपातळीवर सुरू आहेत. या योजनेचा लाभ आता मुंबईतील प्रवाशांनाही मिळू लागला आहे. विशेषतः मध्य रेल्वेच्या हार्बर मार्गावरील स्थानकांना नव्या रूपात सुसज्ज करण्यात येत असून, ही स्थानके प्रवाशांच्या नजरेत भरतील, अशा आधुनिक सुविधांनी सजवली जात आहेत.
या स्थानकांवर जुन्या भिंतींची डागडुजी, शौचालय उभारणी, प्लॅटफॉर्मवरील साफसफाई व सौंदर्यीकरणासह नवीन ॲल्युमिनियम कंपोझीट शीट्स बसवण्याचे काम सुरू आहे. या शीट्स केवळ आकर्षकच नाहीत, तर त्या मजबूत आणि हवामान बदलासही सहन करणाऱ्या आहेत. त्यामुळे दीर्घकाळ टिकावू असून, स्थानकांना आधुनिकतेचा साज चढवत आहेत.

कुर्ला स्थानकात काम सुरू, सँडहर्स्ट रोड स्थानकालाही नवा चेहरा
हार्बर मार्गावरील कुर्ला, वडाळा आणि सँडहर्स्ट रोड स्थानकांत याचा प्रारंभ करण्यात आला आहे. वडाळा आणि सँडहर्स्ट रोड स्थानकांवर ही कामे अंतिम टप्प्यात असून, सध्या कुर्ला स्थानकातही शीट्स बसवण्याचे काम सुरू आहे. स्थानक परिसरातील भिंतींवर या शीट्स लावल्यामुळे सौंदर्यवाढीबरोबरच टिकाऊपणाही सुनिश्चित होत आहे.

१३०० स्थानकांचा विकास; १०४ पूर्ण, उर्वरित कामे प्रगतिपथावर
रेल्वे मंत्रालयाने हाती घेतलेल्या या महत्त्वाकांक्षी योजनेअंतर्गत देशभरातील एकूण १३०० रेल्वेस्थानकांचा पुनर्विकास केला जाणार आहे. गेल्या दोन वर्षांत यापैकी १०४ स्थानकांचा पुनर्विकास पूर्ण झाल्याची माहिती अलीकडेच रेल्वेमंत्री अश्विनी वैष्णव यांनी मुंबईत आयोजित पत्रकार परिषदेत दिली. उर्वरित स्थानकांवरील कामे वेगाने सुरू असून, त्यासाठी स्वतंत्र आराखडे आणि निधी मंजूर करण्यात आला आहे.

प्रवाशांसाठी अनुभव होणार अधिक सुखकर
या योजनेमुळे स्थानकांच्या सौंदर्यवाढीसोबतच प्रवाशांच्या सुविधा सुधारण्यावर भर देण्यात आला आहे. प्रवाशांसाठी स्वच्छ व सुसज्ज शौचालये, माहिती फलक, आरामदायक वेटिंग एरिया, आणि सौंदर्यपूर्ण प्लॅटफॉर्म्स यामुळे एकूणच प्रवासाचा अनुभव अधिक सुखकर होणार आहे. हार्बर मार्गावरील स्थानकांवर याचा प्रभाव लवकरच दिसून येईल, अशी अपेक्षा आहे.