दक्षिण मुंबईतील झोपडपट्ट्या उजळणार
विविध झोपडपट्ट्यांमध्ये आधुनिक प्रकाशयोजना; कुलाब्यात पायलट प्रोजेक्ट
सकाळ वृत्तसेवा
मुंबई, ता. २० : दक्षिण मुंबईतील झोपडपट्ट्या लवकरच प्रकाशमान होणार आहेत. अत्याधुनिक प्रकाशयोजनेच्या माध्यमातून आकर्षक लाइटची व्यवस्था केली जाणार आहे. ‘ए’ विभागाच्या अंतर्गत येणाऱ्या कुलाबा परिसरातील झोपडपट्ट्यांमध्ये पालिका पायलट प्रोजेक्ट राबवणार आहे.
दक्षिण मुंबईत अनेक जुन्या झोपडपट्ट्या आहेत. या झोपडपट्ट्यांना नवीन साज चढवण्याचा प्रयत्न केला जात आहे. यासाठी सर्वप्रथम येथील प्रकाशयोजना सुधारण्यावर भर दिला जाणार आहे. यासाठी प्रखर एलईडी लाइट्सचा वापर केला जाणार असून, जमिनीवरून प्रकाश परावर्तित होणार असल्याचे उजेड सर्वत्र पसरणार आहे. यामुळे झोपडपट्ट्यांचा भाग प्रकाशाने उजळून निघणार आहे. सध्या कुलाबा ‘ए’ वाॅर्ड येथील झोपडपट्ट्यांमध्ये पायलट प्रोजेक्ट राबवला जाणार आहे.
झोपडपट्टी परिसरात अडगळ असल्याने छोट्या विद्युत खांबांचा प्रकाश तितकासा पडत नाही. शिवाय कुलाबा हा व्हीआयपी परिसर म्‍हणून ओळखला जात असून, तिथे नेहमीच वर्दळ असते. प्रखर प्रकाशयोजनेसाठी येथे अत्याधुनिक ल्युमिनन्स लाइटचा वापर केला जाणार आहे. त्‍यामुळे चांगल्या प्रकाशयोजनेसह परिसर उजळून निघण्यास मदत होणार आहे. एका वाॅर्डसाठी सुमारे चार कोटी रुपये खर्च केला जाणार आहे.
महापालिका प्रशासनाने यासाठी अभियांत्रिकी संस्थांच्या कंत्राटदारांकडून कामासाठी कंत्राटदार नियुक्त करण्यासाठी टक्केवारीच्या आधारावर ई-निविदा मागवल्या आहेत. यात प्रसिद्ध फर्म, मालकी, भागीदारी फर्म, खासगी मर्यादित कंपन्या, पब्लिक लिमिटेड कंपन्या, पब्लिक लिमिटेड कंपन्या कायद्यांतर्गत नोंदणीकृत भारतीय कंपनीकडून निविदा मागवण्यात आल्या आहेत. निविदा प्रक्रिया पूर्ण करून लवकरच कामाला सुरुवात केली जाणार आहे. पुढील तीन महिन्यांत हे काम पूर्ण केले जाणार आहे.