गंभीर हृदयरोगावर उपचार
६८ वर्षीय रुग्णाला जीवनदान
मुंबई, ता. २१ : एका ६८ वर्षीय पुरुष रुग्णावर गंभीर उजव्या बाजूच्या हृदय निकामी अवस्थेवर अत्याधुनिक ड्युअल-व्हॉल्व कॅव्हल इम्प्लांटेशन करण्यात आले. या प्रक्रियेमुळे रुग्णाला शरीरातील तीव्र रक्त संचयाच्या लक्षणापासून आराम मिळाला आणि मूळ ट्रायकसपिड झडप न काढता उपचार करण्यात आले. भारतातील अशा प्रकारचा पहिलाच प्रयोग असल्याचा दावा वॉकहार्ट रुग्णालयातील डॉक्टरांनी केला आहे.
रुग्णाला उजव्या हृदयाच्या कार्यातील बिघाडाची पारंपरिक लक्षणे दिसून आली. रुग्णाच्या इतिहासात उच्च रक्तदाब, मधुमेह आणि लिपिड विकृती यांसारख्या जोखमीच्या घटकांचा संशय असला तरी कोणतीही अधिकृत सहरोग नोंदलेली नव्हती. कार्डिओलॉजिस्ट डॉ. परिन सांगोई यांनी मूळ झडप बदलण्याऐवजी दुहेरी झडप धोरण स्वीकारले. रुग्णाच्या सुजेतील लक्षणे कमी झाली आणि पोटदुखी दूर झाली. त्‍यामुळे उच्च धोका असलेल्या रुग्णांसाठी कॅव्हल व्हॉल्व इम्प्लांटेशन ही एक प्रभावी पद्धत ठरू शकते, असे डॉक्‍टरांनी सांगितले.