ताडदेव आरटीओ कार्यालयाच्या इमारत कामाला गती
पावसाळी अधिवेशनानंतर कामाला होणार सुरुवात
सकाळ वृत्तसेवा
मुंबई, ता. २३ः ताडदेव आरटीओ कार्यालयाचे रुपडे पालटणार आहे. येथे नवीन इमारतीसह अन्य सुविधा देण्याचा प्रस्ताव परिवहन विभागाने राज्य सरकारकडे दिला होता. त्याला राज्य सरकारने मंजुरी दिली. त्या कामासाठी आवश्यक निधीला येत्या पावसाळी अधिवेशनात मंजुरी मिळण्याची शक्यता आहे. त्यानंतर कामाला सुरुवात होणार आहे, अशी माहिती परिवहन विभागाने दिली.
ताडदेव आरटीओ कार्यालयाची लवकरच चार मजली इमारत उभी राहणार आहे. त्यासाठी २७ कोटी ९९ लाख रुपये खर्च येणार आहे. मुंबईतील अंधेरी आरटीओत नवीन इमारत व अन्य सुविधा उपलब्ध केल्यानंतर ताडदेव कार्यालयाचे रुपडे कधी पालटणार, असा प्रश्न होता. त्यानुसार परिवहन विभागाने प्रस्ताव बनवून तो मंजुरीसाठी पाठवला होता, पण निर्णय झाला नव्हता.

कार्यालयाची इमारत ८५ वर्षे जुनी
ताडदेव आरटीओ हे राज्यातील पहिले आरटीओ कार्यालय आहे. इंग्रजांच्या काळात १९४० रोजी ही इमारत बांधण्यात आली होती. तीस वर्षांनंतर एखाद्या इमारतीचा पुनर्विकास केला जातो, पण ८५ वर्षे जुन्या कार्यालयाचा पुनर्विकास बाकी होता. आता अखेर त्या पुनर्विकासाला मुहूर्त मिळाला आहे. कार्यालयाचे बांधकाम जुने होते, तसेच वारंवार दुरुस्तीसाठी पाठपुरावा करावा लागत होता. या जागेत साप आणि उंदरांचा वावर होता. तसेच चांगले शौचालयदेखील नव्हते. त्यामुळे नवीन इमारत बांधण्याची मागणी केली जात होती. आता लवकरच निधी उपलब्ध होणार असून, त्यानंतर आरटीओ कार्यालयाचे रुपडे पालटणार आहे.

महाराष्ट्रात पहिल्यांदा १९४० पासून सुरू झालेल्या मुंबई ताडदेव आरटीओ कार्यालयाच्या इमारतीच्या बांधकामासाठी प्रशासकीय आणि वित्तीय मान्यता मिळाली होती. या कामासाठी निधीची आवश्यकता आहे. येत्या पावसाळी अधिवेशनात निधीला मंजुरी मिळण्याची शक्यता आहे. त्यानंतर कामाला सुरुवात केली जाईल.
- भरत कळसकर, प्रादेशिक परिवहन अधिकारी, ताडदेव आरटीओ