कोरोनाविरोधात कामा रुग्णालय सज्ज
३० खाटांची व्यवस्‍था
सकाळ वृत्तसेवा
मुंबई, ता. २४ : कोरोनाच्या पार्श्वभूमीवर रुग्णालये त्यांच्या सुविधा वाढवण्याच्या दृष्टीने विविध उपाययोजना करीत आहेत. मुंबईतील कामा आणि अल्बलेस रुग्णालय आपल्या सर्व सुविधांनी सुसज्ज झाली आहेत. रुग्‍णालयाने ३० खाटांची व्यवस्‍था केली आहे.
कामा आणि अल्बलेस रुग्णालय हे राज्यातील महिलांसाठी आणि बालकांसाठी समर्पित असलेले एकमेव रुग्णालय आहे. कोरोनाच्या वाढत्या रुग्णसंख्येच्या पार्श्वभूमीवर कामा रुग्णालयाने पुन्हा एकदा स्त्रिया आणि बालकांच्या आरोग्याची काळजी घेत महत्त्वपूर्ण पाऊल उचलले आहे. मागील लाटेत दाखवलेल्या तत्परतेप्रमाणेच या वेळीही रुग्णालय प्रशासनाने कोरोना पॉझिटिव्ह स्त्रिया व बालकांसाठी स्वतंत्र कक्षाची व्यवस्था केली आहे.
कामा रुग्णालयाचे अधीक्षक डॉ. तुषार पालवे यांनी सांगितले, ‘‘कोरोनाची लाट पुन्हा एकदा डोके वर काढत आहे. या पार्श्वभूमीवर स्त्रिया आणि बालकांची विशेष काळजी घेणे आवश्यक आहे. मागील अनुभवावरून आम्हाला हे लक्षात आले की, स्वतंत्र कक्ष असणे अत्यंत आवश्यक आहे. त्यामुळे आम्ही ही व्यवस्था वेळीच उभारली आहे. ‌तसेच त्यांनी सतर्कता आणि काळजी घेण्याचे आवाहनदेखील केले आहे. रुग्णालय प्रशासनाने नागरिकांना सार्वजनिक ठिकाणी मास्क वापरणे, सामाजिक अंतर पाळणे आणि लक्षणे आढळल्यास त्वरित चाचणी करून उपचार घेण्याचे आवाहन केले आहे. कोरोनाशी लढण्यासाठी अशा प्रकारच्या सकारात्मक आणि नियोजनबद्ध उपाययोजना अत्यंत महत्त्वाच्या ठरत आहेत.

विशेष सुविधांनी युक्त स्वतंत्र कक्ष
रुग्णालयाच्या सूत्रांनी दिलेल्या माहितीनुसार, नव्याने सुरू करण्यात आलेल्या या कक्षात एकूण ३० खाटा उपलब्ध करण्यात आल्या असून, त्यात १० खाटा बालकांसाठी आणि २० खाटा स्त्रियांसाठी राखीव ठेवण्यात आल्या आहेत. या कक्षात व्हेंटिलेटर, ऑक्सिजन पुरवठा यंत्रणा, निगराणी प्रणाली आणि आवश्यक वैद्यकीय उपकरणांची व्यवस्था करण्यात आली आहे. अनुभवी आणि प्रशिक्षित महिला डॉक्टर, नर्सेस आणि सहाय्यक कर्मचारी तैनात करण्यात आले आहेत.