सर्वंकष मूल्यमापनासाठी शिक्षकांना सर्वंकष प्रशिक्षण
विद्यार्थ्यांची कौशल्ये विकसित करण्यावर सर्वाधिक भर

मुंबई, ता. २४ : राष्ट्रीय शैक्षणिक धोरणाच्या पार्श्वभूमीवर राज्यातील शाळांमध्ये सर्वंकष मूल्यमापन पद्धत विकसित करून राज्यातील प्रत्येक विद्यार्थ्यामध्ये प्रत्येक विषयाचे कौशल्य, प्रश्नांची ओळख करून त्यासाठीचे मूल्यमापन केले जाणार आहे. यासाठीची प्रक्रिया अत्यंत प्रभावीपण राबविण्यासाठी राज्य शैक्षणिक संशोधन व प्रशिक्षण परिषदेकडून (एससीईआरटी) पुढाकार घेण्यात आला आहे. याच पार्श्वभूमीवर येत्या काळात परीक्षा पद्धती आणि त्यांच्या मूल्यांकनात आमूलाग्र बदल होणार आहेत. यासाठी ‘एससीईआरटी’मार्फत शिक्षकांपासून ते संबंधित अधिकाऱ्यांचेही प्रशिक्षण सुरू असल्याची माहिती ‘एससीआरटी’चे संचालक राहुल रेखावार यांनी दिली.

राष्ट्रीय शिक्षण धोरण २०२०प्रमाणे महाराष्ट्र राज्य मंडळाचा संपूर्ण अभ्यासक्रम हा वैविध्यपूर्ण आणि केंद्रीय मंडळाशी पूरक पॅटर्नवर तयार केला जात आहे. यंदाच्या शैक्षणिक वर्षात एससीईआरटीच्या धर्तीवर पहिलीपासून अभ्यासक्रम लागू केला जात आहे. या नव्या बदलांमुळे येत्या काळात परीक्षा पद्धती, परीक्षांचे स्वरूप, परीक्षेतील प्रश्नांचे स्वरूप आणि त्यांचे मूल्यमापन आणि यासोबतच त्या मूल्यमापनाद्वारे काढण्याचे निष्कर्ष यामध्ये बदल होणार आहेत. शिवाय मूल्यमापन आणि त्यातील निष्कर्ष आदींमध्येही सुधारणा होणार असून, त्यादृष्टीने महाराष्ट्र राज्याचा सातत्यपूर्ण सर्वंकष मूल्यमापनाचा आराखडासुद्धा सुधारण्यात येत असल्याची माहिती संचालक रेखावार यांनी दिली.

..
शैक्षणिक गुणवत्ता सुधारणार
‘एनसीआरटी’ने दिलेल्या मार्गदर्शक सूचनांच्या आधारे ‘एससीईआरटी’कडून राज्यातील तज्ञांची मते जाणून घेऊन यामध्ये सुधारणा करण्यात येत आहेत. हे करीत असताना २१व्या शतकात लागणारी विद्यार्थ्यांची कौशल्ये आणि प्रत्येक विषयासाठी, प्रत्येक मुद्द्यासाठी सर्व प्रकारच्या प्रश्नांची ओळख आणि सराव विद्यार्थ्यांचा होईल, याचा प्रयत्न या मूल्यमापनातून करण्यात येणार आहे. यासाठी सध्या शिक्षकांचे प्रशिक्षण सुरू आहे. या नव्या प्रक्रियेतून शैक्षणिक गुणवत्ता सुधारण्यासाठी एक मोठा मार्ग मोकळा होणार असल्याचेही ‘एससीआरटी’चे संचालक राहुल रेखावार यांनी सांगितले.